山竹-min

山竹 駛唔駛搞到強制撤離

超強颱風 山竹 向緊香港、澳門方向進發,依家未肯定登陸地點,但有一個問題,依家應該就要討論,就係強制撤離嘅問題,因為如果真係搞到嚴重風暴潮,以及排水系統無法處理大量雨水,就好可能要先作強制撤離以策安全,並無其他方法。

山竹 強制撤離嘅問題

先講澳門,香港人依家唔應該再去澳門,仍然喺澳門嘅香港人,應該儘快離開,唔好搞到禮拜五船都無至受困港澳碼頭,除非你係返工,否則星期五、六就要停船至喺度嘈返唔到香港,呢種諗法完全唔可以接受。雖然澳門有人開始做風暴撤離宣傳,但我並唔認為澳門政府會當機立斷作出適當決定。澳門氣象部門如果真係做咗最壞打算,依家就要作出強制撤離嘅決定,唔可能成個城啲建築物喺晒水度至做決定,呢個係荒謬嘅。

至於香港,港珠澳大橋係應該停工,我唔認為果條咁嘅橋嘅狀況頂得頂 山竹 呢啲 Cat 3 – 5 嘅異形,機場以及大嶼山諸鎮嘅撤離計劃,係應該有喺度,關西已經膠到無朋友,無人想再膠啲,應該係趁鐵路仍然可以運作果陣,就要做好撤退安排,因為無人知青馬大橋係唔係堅頂得住呢個異形風。而高鐵,如果真係登陸落暴雨,希望會報銷,報銷咗,就天下太平,乜嘢都唔駛煩。同樣,港珠澳大橋報銷,應該係香港人嘅普遍願望嚟。

其實依家香港政府,係應該要就全港唔同地區作出相應計劃,香港優勢係山多,但山多有山多嘅問題,因為山泥傾瀉都係一個好大劑嘅問題,所以依家政府係要做評估,低窪,以及有山泥傾瀉危險嘅住宅,係應該有相對應嘅強制撤離計劃,呢啲嘢,依家就要做,唔係仲喺度攞 山竹 嚟開玩笑,對於平民,係應該要有可能強制撤離嘅覺悟,但政府係應該有個清楚嘅plan,因為颱風呢家嘢,本身唔係無喇喇好似地震咁,係預測無從嘅天災,颱風好多嘢係有一定可預測性,並唔係政府完全無時間做嘢,寧願做多,好過做少,因為做多最多得個桔,但做少就會死人,權衡輕重之下,梗係做多好過做少。但依家睇個款,呢個香港政府唔似有任何明確計劃同事前警告,真係 山竹 嚟果陣都唔知乜事會發生。

發表迴響

你的電子郵件位址並不會被公開。 必要欄位標記為 *