中聯辦-統監府-min-2

中聯辦 告得到?曾鈓成咪當市民白痴

曾鈺成喺接受劉慧卿喺民主黨節目嘅訪問果陣,再度提出修改《基本法》,明確將 中聯辦 職能寫落去,仲話 中聯辦 如果違反相關修訂係可以告佢,當然,呢啲根本係語言偽術嚟,邊個會信佢至得㗎,明白 中聯辦 實際政治意圖嘅人,就更加唔可能支持曾鈺成呢啲假天真,真呃人嘅所謂主張或者講法。

中聯辦 根本想正式奪香港人嘅權

先唔計呢個主張,根本係違反《中英聯合聲明》呢個重大憲政同歷史問題,大家先睇《基本法》22條點寫:

中央人民政府所屬各部門、各省、自治區、直轄市均不得干預香港特別行政區根據本法自行管理的事務。

咁 中聯辦 根據現行《基本法》,佢係中央人民政府所屬部門,佢個名都寫得好清楚,中央人民政府駐香港聯絡辦公室,佢既然只有聯絡用途,佢啲友亂嚟可以用《基本法》22條進行司法覆核,你依家明定 中聯辦 職能做乜,呢啲仲唔係 中聯辦 想由韓國統監府變成朝鮮總督府嘅手段,呢啲呃神騙鬼嘅嘢,就咪當香港人係傻先得。

尤其係,喺依家嘅憲制一開修改《基本法》之門,新修入去嘅都好大機會係惡化,咁點解要修先得,我相信以土共喺高鐵上用嘅偷天換日手段,最終結果就係 中聯辦 由韓國統監府變朝鮮總督府,仲衰過當年日本帝國迫大韓帝國放棄主權,令大韓帝國由日本帝國嘅保護國,變成咗所謂合邦,但其實係當原大韓帝國領土嘅國民係二等公民看待。屆時你諗住點告 中聯辦 咁呢?曾生。

依家中國係千方百計想搞內地延長主義,即係日本式果套殖民主義,而唔係英國人一貫喺南洋同香港用開特別統治主義,最慘係,日本搞內地延長主義,好多時係搬龍門,有事就係日本國民,無事就係另一種人,呢個亦係點解日本喺韓國嘅統治遺留大量恩怨情仇嘅原因之一,我都幾肯定,你依家中國喺香港搞內地延長主義嘅結果,就係香港人憎到你班中國人入骨,一如中華民國喺台灣搞內地延長主義都係出事一樣,土共可以繼續吹嘅,但我相信一旦主權再換,或有乜大事,呢班土共應該係會橫屍街頭收場,並唔會有第二樣嘢發生到。呢班友唔睇歷史,就係唔知代價。

發表迴響

你的電子郵件位址並不會被公開。 必要欄位標記為 *