網易財經-min

網易財經 關門大吉:支爆更危險

網易財經 突然喺9月11日停止更新,原因十分之多猜測,只不過,當中國大肆針對財經傳媒果陣,錢銀嘅嘢唔可以講任何真話嘅話,即係支爆再惡化成點,都好可能係難以掌握,咁就真係大件事,我相信大家投資中國同香港都係時候停。

網易財經 衰妄議中央

網易財經 關於個人所得稅開徵起點嘅評論,固然係得罪方丈,因為依家中國政府係無錢,土地財政已經此路不通,而又要「刺激消費」減增值稅(VAT),你依家 網易財經 對習近平嚟講近乎係幫佢倒米,所以果篇評論肯定係被人去之而後快嘅原因。范冰冰被控制果單新聞,反而未必真係被封原因,因為果單新聞某程度應該係北京有人想對范冰冰流亡美國單嘢消毒,點知消毒消到膠咗, 網易財經 要刪文係後話,但范冰冰果單似係執行柯打味道濃厚,所以喺稅制問題上「妄議中央」就一定死得。

當 網易財經 俾啲稅制建議都被人拉人封艇,依家學人行《基本法》廿三條,你班土共想幫邊個做市咁,財經傳媒暢所欲言,呢個係維持金融市場暢旺嘅基本條件,所以大部分中國股票仍然要喺香港交易,唔喺上海交易,因為上海唔可以公然對股市作出公正評論,而外匯亦唔能夠自由進出,咁點炒股呀,如果照中國依家執咗 網易財經 嘅邏輯,依家做股評人風險大過做政評人,隨時到沈振盈都被人捉到坐洗頭艇或洗頭火車。 網易財經 被關門大吉後,已經有人估緊華爾街見聞仲可以捱幾耐,我睇唔捱得耐。

全世界都係,最要求敢講嘢嘅報紙,正正係財經報紙,財經報紙反而係知識分子最愛,唔係因為個個愛上炒股,而係財經報紙無所謂文人辦報自居嘅報紙嘅迂腐,有果句講果句,當中國嘅財經傳媒講兩句都要封艇果陣,即係中國果種瘋狂集權主義進一步加劇,甚至一旦中國有乜重大財經問題,中國政府會隱暪到底,到真係有乜冬瓜豆腐果陣,你根本走唔到,依家係支爆,但仲係慢慢爆,你知道火頭,但無咁快燒過嚟,可以諗吓點走,但如果依家咁冚 網易財經 ,即係中國有乜問題嘅蜘絲馬跡更加難搵到,咁有乜事果陣係核爆級嘅慘死,依家仲投資股市,有乜後果自己諗喇。

發表迴響

你的電子郵件位址並不會被公開。 必要欄位標記為 *