関西空港-min-打風

打風 仲行藥妝店傻的嗎

超強颱風飛燕橫掃關西,俾著我喺大阪、京都一帶一定留喺酒店,連冷氣組件都可以吹得郁仲要半空解體,威力非凡。但香港人可以膠到 打風 仲行藥妝店,幾時香港人變咗戰鬥民族㗎,我覺得真係黐線到一個點,令人完全啞口無言。

打風 仲出街傻的嗎?

本來香港無視八號風球警告,一宣布停工停課就約人打麻雀呢種陋習已經係十分令人非議,因為公共交通工具理論上要停駛,呢個係搵命搏嘅行為,只不過香港長年 打風 都唔會出現大型棚架倒塌等現象好耐日子,無事發生。但香港可以咁玩命,唔代表可以喺日本咁做,更唔代表可以喺飛燕呢個颱風下咁做,超強颱風我估香港無概念,Cat 5颱風我估你有概念,Cat 5颱風係怪物嚟,美國東岸遇到Cat 5風都可以嚴重傷亡,你班友行藥妝店無被街上招牌打中算你大命,Cat 5香港歷史可以對照就係溫黛嘅級數,你問吓經歷過嘅老人家,溫黛果啲係乜嘢異形風嚟,因為飛燕係Cat 5風,所以日本嘅情況叫做日本建築物堅係實淨,我相信京阪神地區喺上次大地震後鞏固工程得到驗證。

香港人呢種態度,其實好有問題,依家天氣反常,上次天鴿只係 Cat 2都已經好大鑊,香港並唔係唔會嚟件 Cat 5 風登陸,九月同十月仍然係颱風旺季,秋颱好多時都仍然好有威脅,如果一嚟一劑 Cat 5或 Cat 4颱風登陸,以香港人嘅態度,我真係覺得堅大件事,我相信死傷好可能係十分慘重,因為長期未有 Cat 4 或 5 嘅颱風襲擊,香港一切防災措施根本係未經過驗證,大家真係以為李氏力場呢個結界係存在於人世間。

喺地球天然反常下,其實香港人應該按照日本飛燕颱風襲擊嘅情況,特別京阪神地區嘅災情,作出模擬評估,特別相關損失,同防災措施夠唔夠,神戶港甩幾十個貨櫃落海,香港我懷疑不止此數,以香港人嘅做事態度,我都未計新界山區山泥傾瀉等問題。梁振英依家仲堅持話要發展郊野公園,呢條友真係心腸惡毒兼無人性,大佬,一旦真係出現 Cat 4或 Cat 5 颶風,香港玩得起?證明有啲人為咗自己,人地條命會係點一啲都唔在乎,亦無居安思危。

發表迴響

你的電子郵件位址並不會被公開。 必要欄位標記為 *