関西空港-min-打風

関西空港 打風嘅教訓

颱風飛燕以日本近廿年以嚟最強風暴姿態進擊關西一帶, 関西空港 水浸、登機橋損毀、斷水斷電都算,但一個最大災難依家至發生,就係 関西空港 同日本本島之間嘅行車公路橋都斷埋,呢件事就好麻煩, 関西機場 應該有排都唔用得。

関西機場 俾香港嘅教訓

當年 関西機場 為咗慳錢,所以鐵路橋要JR同南海電鉄共用,造成容量樽頸,同香港問題一樣,問題係 関西空港 基本上乜陸路交通都係靠果條橋,所以一斷橋就有排煩,特別依家困喺機場嘅人,因為 関西機場 現況未必適合喺颱風過後再度營運,至少點樣輸送大量旅客,以及相關物資成為問題,好大程度可能要將伊丹國際機場重新作國際線使用一段時間,再加上神戶國際機場分流至得,只不過,日本有大阪灣有三個機場,平日係膠,但出現 関西機場 呢類受災情況,就因禍得「福」,至少関西地區嘅航空交通未至於中斷,係會好膠,但膠好過全斷。

但香港係另一回事,因為香港呢個自己嘅司法管轄區,得香港機場可以用,所以係會出問題,一旦青馬大橋出現斷橋意外,跟住香港機場可以點,跟住東涌新市鎮居民可以點,仲要依家嚟港珠澳大橋後,青馬大橋嘅交通容量隨時都出事,所以我相信香港最迫切係第二條通往大嶼山嘅行車及鐵路大橋,至少避免呢種只要斷一條橋即變孤島嘅情況。香港係唔可能要求澳門同深圳機場分流交通,深圳就明顯係入境規條同香港距離太大,而澳門,咪玩喇,割讓澳門機場俾香港我都覺得未必用得著,因為澳門呢個地方啲入境官員同治安嘅問題,係唔適合做香港嘅後備機場。

唔好話 関西機場 嘅情況唔會發生喺香港,首先,你唔知幾時有同溫黛或更勁嘅颱風吹襲,依家地球氣候變化係好難講,亦無人知小冰河時期幾時再返嚟,如果小冰河時期返嚟,可能依家暖化嘅趨勢逆轉,未必咁大劑,另一方面,你相信香港依家啲橋樑保養?香港建築界果種腐敗,已經去到匪夷所思嘅地步,以往英治時期起得幾穩陣,如果做唔到好嘅保養,喺香港嘅位置一樣會出事,大家對香港建築界依家變成點嘅衰樣,都已經心裡有數,無可能好似日本咁好。

One thought on “関西空港 打風嘅教訓

發表迴響

你的電子郵件位址並不會被公開。 必要欄位標記為 *