耒陽-騷亂-min

耒陽 騷亂:中國可以捱幾耐?

中國經常都發生維權事件,而共產黨自己濫用暴力就老屈人暴動,魚蛋革命係典型例子(所以我好少要求追究負責審判嘅法官,但梁天琦案係一大例外,中共倒台後定必追究),但 耒陽 開學日騷亂特別注目,除咗反映習近平殘暴手段包唔住火外,仲有一樣嘢,支爆下地方可能接連起義。

耒陽 騷亂與地方財政不穩

大家可以睇下騷亂情況,我故意搵自由亞洲電台嘅片段

耒陽 騷亂嘅背景好簡單, 耒陽 市政府財政搞唔掂,本來應有公立學校學位不足,跟住政府官員同私立學校老闆勾結刮一筆,其實以共產黨嘅個性,教育係唔可能任你民辦老板搞, 耒陽 遇上都係刮財嘅仆街,如果遇上一個半個唔刮財,但暗中搞革命思想傳播你就仆街,所以共產黨一般都將教育「緊抓在手裡」,係筆桿子、槍桿子一類級數,依家 耒陽 咁玩理由得一個,根本市政府財政破產,官員借機刮完一筆後遠走西方國家,但玩到裝修甲醛超標,喺一孩政策下嘅子女特別寶貴,啲家長因而同政府死過,反正依家同政府死過都無乜損失,但人民生活無乜錢就係。

耒陽 都玩到咁,玩到官方傳媒不得不提及呢件事,其他地方政府一爆煲果啲亂龍嘢一爆,就乜事都可以發生,搞到四川保路風潮咁,然後有縣市出現防衛真空情況,跟住有人玩權鬥,膽搏膽玩兵變,然後中共政權突然瓦解大家都唔知發生乜嘢事,一如大清帝國瓦解都係四川保路風潮,加幾個武漢新軍工程營嘅友仔,驚自己被捉,反正橫又死,掂又死,幾大就幾大,咁樣一搏之下然後竟然賭贏咗,跟住就係大清倒台,軍閥割據嘅事。依家中共,亦明顯向緊呢個方向走,所謂支爆,其中一爆,正係呢種大清帝國式嘅瓦解,衰過當年中華民國政府敗走台灣,中華民國政府走後,都叫有個新政府有一定組織力,補咗管治真空,但依家中共一倒,好大機會係唔知乜嘅無政府狀態,大清帝國倒果刻,大批滿洲人被漢人好似殺豬咁殺,所以蒙古人至要尋求蒙獨,大家諗吓一旦中共倒台,啲暴民會係乜嘢狀態,一定血腥到無朋友。

所以田北俊一士諤諤話港獨有好處有壞處,要討論,佢真係全香港最清醒果個,真係突然有人要支持港獨嚟保住條命都唔奇。做人去到太盡,只會死無全屍。

One thought on “耒陽 騷亂:中國可以捱幾耐?

  1. mrsmallbee 說:

    天朝嘅輪迴,可能又食人了

發表迴響

你的電子郵件位址並不會被公開。 必要欄位標記為 *