劉鳴煒 所接受嘅外星金錢觀

劉鳴煒 應該係近年香港講嘢最唔知自己黐線嘅有錢人之一,由佢嘅package論到最近香港電台節目,講佢十歲果陣收到十萬銀現金做佢生日禮物, 劉鳴煒 由細到大接受嘅金錢觀,直情係外星級數,我真係唔知點形容先好。

劉鳴煒 唔意識到自己有問題

首先, 劉鳴煒 話佢由老豆手上收到用公文袋包嘅現款,成個畫面已經係kai到無朋友,大佬,依家拍緊《樹大招風》,要將一舊現金交俾綁匪贖番人質呀? 劉鳴煒 乜唔覺得成個場景好有問題嘅咩,證明佢細個係連正常電影同電視都無睇,唔怪得可以火星到呢個地步。

用公文袋包住一舊Cash做生日禮物,其實成件事十分之惡俗,簡直係bad taste之最,我明白佢老豆或者好忙,但未至於要bad taste到呢個層次, 劉鳴煒 無覺得其實佢老豆根本唔care佢嘅咩?攞住舊Cash呢家嘢真係令人啞口無言,而成半年係咁數銀紙,雖然成件事十分治癒,但都係果句,呢啲嘢講出嚟,你唔招惹綁匪算你執到,喺德國應該一早招嚟綁匪好耐,呢個亦係德國啲富豪家族喺德國社會低調到近乎隱形嘅地步。

當然,我有理由相信,其實佢老豆送十萬銀Cash目的,除咗無時間照顧佢外,仲有係想知道個仔想攞筆錢做乜,但擺喺度半年,最後入阿媽聯名嘅銀行戶口,我嘅結論只會係優柔寡斷,無主見呢七個字,如果劉生細個好似佢老豆咁,有明確商業計劃或頭腦,其實會籌劃用咁大筆錢做乜,當然如果攞晒去買玩具,實係敗家仔,梗係會出事,但如果攞住十萬銀乜都唔做,最後阿媽出手,咁大家點相信 劉鳴煒 係一個雄才偉略嘅企業主管,唔怪得大劉將唔少家財交俾甘比,由實務角度,華置喺甘比管治下會壯大,定係劉鳴煒,我答案係甘比,甘比某程度上應該學咗唔少商業社會嘅手法,佢作為一個記者出身,佢嘅訓練應該比 劉鳴煒 更有能力去應付呢個龐大帝國。如果 劉鳴煒 係準備好接手一個龐大王國,唔會係咁講kai嘢,仲要俾人感覺極為囂張嘅kai嘢,但佢嘅成績,唔係佢老豆果隻級數果吓慘。

見微知著,如果我係華置股東,真係唔放心投資一間外星人公司度。

發表迴響

你的電子郵件位址並不會被公開。 必要欄位標記為 *