解放軍駐港部隊

香港人加入 解放軍 嘅技術問題

土共吹風話中共考慮俾香港人加入 解放軍 ,我唔知中國係咪局勢急變,定係有人詐傻扮懵,但如果中國唔解決 解放軍 係黨嘅私軍嘅核心問題,香港人入 解放軍 係唔可能,中國亦唔會想中國版嘅施明德出現,甚至最終武力推翻中共政權。

解放軍 在香港嘅問題

首先,加入 解放軍 ,等同加入一個非法組織嘅武裝力量,因為中國共產黨到今日喺香港仍然係非法組織,所以至要透過駐軍法解決呢個技術問題,否則解放軍喺香港同新義安、14K嘅打手無異。所以一係中共變成一個受香港法律規管嘅合法政黨,一係 解放軍 脫離中共控制變成中國嘅正式政府部門,否則香港人加入 解放軍 嘅可能性都係唔存在,當然,土共一定好想中共浮上水合法,佢地嘅正式黨員身份可以曝光,但呢樣嘢係唔可能發生,除非有人想走聯合聲明數,呢個又作別論。而軍隊國家化,成個中共政權基礎會破產,因為黨指揮槍係中共政權嘅唯一基礎,呢樣嘢都無中共就死得, 解放軍 本質其實同納粹德國黨衛軍無異,喺納粹德國年代武裝黨衛軍(Waffen-SS,Waffen於德文即武器),同國防軍(Wehrmacht,直譯即防衛力量)係兩回事嚟,喺紐倫堡判決上都有分清兩者嘅分別。中國係衰到連Wehrmacht呢部分都係唔存在。

當然,中國依家突然話研究香港人加入 解放軍 問題,都係應付土共用,因為依家土共一直想名正言順奪權,而另一方面,佢地睇見BNO可以參與英國陸軍,甚至去到御林軍呢啲核心部門,同以往華籍英兵主要喺義勇軍好唔同,當香港英籍人士喺英國陸軍、海軍有一定地位,而土共只可以搞洗腦打飛機訓練營,而唔能夠真係當兵耀武揚威果陣,佢地一定向北京投訴,但北京又唔知點答佢地,結果成日話要研究,但最終結果我相信係得個桔,因為政治現實係做唔到,呢個係土共應該心知肚明,呢個亦係研究中共黨史嘅人應有常識嚟。

而 解放軍 依家係要靠向上行賄至入到伍同升到官,至於土共係咪睇中呢條財路,習近平可以留意吓,呢班粉皮無錢賺嘅主張係係唔會提出嚟,呢啲就叫中國國情。

發表迴響

你的電子郵件位址並不會被公開。 必要欄位標記為 *