登革熱-min

登革熱 喺秋季玩到失控

雖然香港就嚟到乾燥嘅秋季(如果天氣無反常),只不過 登革熱 暫時係失控,長洲成班人中 登革熱 ,跟住我睇獅子山公園有疫情都係唔出奇,我諗除咗噴有DEET成份嘅蚊怕水出街,根本係唔會有其他有效方法防止到自己唔中招。

登革熱 嘅核心問題

當然政府要教育公眾唔好積水養蚊,但問題係,香港地一街都係蚊係邊個責任,講到尾就係地盤管理不力,政府漠視果啲唔平嘅路同巷仔,特別後巷,跟住排水系統,市區係做得唔錯,因為涉及樓價,但鄉郊地區由得你死,我都未計堆填區嘅垃圾汁問題,其實堆填區本身已經係蚊患來源,只不過依家未有十分之有力證據證明同佢有關,但理論上,長洲同黃大仙都搞到一街 登革熱 ,咁堆填區嘅又有乜出奇,係爭在果啲蚊會唔會飛到果啲地方繁殖。大家唔好低估啲蚊飛行能力,長洲同獅子山公園都好遠吓,蚊係可能透過現代交通工具,由一個地方去到另一個地方,根本唔可能防止啲蚊入到地鐵,或者鐵路,或者渡輪。正如大家都唔知 登革熱 嘅疫蚊實際由邊度出嚟。

所以 登革熱 核心問題係衛生管理,傳染病一向係公眾行政有無問題嘅指標,因為傳染病係政府管理有問題,多過其他嘢,而當政府根本管治失敗果陣,民眾可以做只有自保,包括做好自己周圍衛生,同噴蚊怕水,跟住你可以做好有限,甚至可能咁講, 登革熱 只不過係前奏,我相信日後更多由中國嚟嘅傳染病,依家香港政府更有無能力處理,香港政府依家做維穩機器仲有能力,但解決問題能力實際上連董建華時代都不如,董建華時代好歹仲有陳方安生,曾蔭權呢啲定康之治留番嚟嘅人喺度,但依家,香港政府掌權都係一班無心做嘢,有心搞嘢嘅擦鞋仔,係唔會處理到疫症。

蚊怕水,喺香港買嘅話,我有一點提醒,我唔知其他本地牌子蚊怕水,香港政府有無監管,特別確保有效成份含量一如標籤所示,喺德國,除咗我少量有賣Anti Brumm,大家就係信SC Johnson嘅Autan同OFF!,因為SC Johnson係收購成個拜耳嘅蚊怕水部門,連Autan同DEET做法一併繼承,我喺香港以往都係買Autan,我唔知香港仲有無。除咗DEET,Icaridin基本上都係拜耳搞出嚟。如果唔想用化學為本,係得有Citriodiol成份係經過驗證有效,但香港邊隻蚊怕水係Citriodiol我就唔知喇。

One thought on “登革熱 喺秋季玩到失控

發表迴響

你的電子郵件位址並不會被公開。 必要欄位標記為 *