碧桂園-min

碧桂園 森林城市玩完

碧桂園 森林城市呢個項目,我好早講咗會玩完,果然不出我所料,喺首相馬哈迪醫生屢次警告無效後,宣布 碧桂園 不得將森林城市樓盤單位賣俾非馬來西亞公民,亦唔會向 碧桂園 森林城市業主發出任何簽證,簡單嚟講,成個項目已經玩完。

碧桂園 根本搞殖民項目

碧桂園 森林城市成個項目,連我呢個南洋人都認為荒謬透頂,最初係完全為咗賣俾中國人,呢個項目我用危害大馬國家安全嚟形容都絕不為過,後嚟搵新買家,都唔係馬來西亞人,亦無為馬來西亞帶嚟建築工程以外嘅就業機會,我係馬哈迪醫生嘅話,點解我要俾你 碧桂園 班友繼續玩落去,特別有唔少中國人,都會喺一啲第三世界國家攞到國籍後再過嚟,我有理由相信,所謂嘅新買家,其實都係一大批中國人, 碧桂園 屢勸不聽,當馬哈迪醫生係傻,恃著中國支持就當大馬國家主權,最後咪咁收場。

其實喺大馬選舉結果出咗後,我已經斷言 碧桂園 森林城市呢個項目係會玩完,因為睇經濟,喺南洋必須連政治一齊睇,否則你會死得好慘,政治經濟係一家嚟。

碧桂園 森林城市玩完,其實其他類似森林城市嘅樓盤前途會係點,已經有十分之明顯嘅答案,就係除非果啲樓盤馬來西亞人買得起,或明顯對大馬國民就業有利,否則都會玩完,但我睇唔到有幾多個呢類似第二家園計劃招徠嘅樓盤,本身有呢個改變大馬經濟嘅能力。對於依家被納吉虧空,仲要納吉同中國狂沽馬幣落井下石嘅馬來西亞,唔係唔要移民,但移民唔該唔好只係買磚頭,應該係能夠為大馬帶嚟足夠嘅就業機會,特別係為馬來人帶嚟就業機會。

依家仲有件茂利,喺咁推銷大馬第二家園計劃相關樓盤,我唔知條友想點,但我作為南洋人,我依家明確忠告大家,除非首相馬哈迪醫生嘅政策有明顯變化,否則同大馬第二家園項目相關任何投資都唔好掂,如果你申請緊嘅,你都要有心理準備,最後可能批唔出任何簽證,當然,如果你已經有簽證,我相信馬哈迪醫生唔會為難你,咁唔該喺磚頭以外,提供切切實實嘅就業機會俾馬來西亞各族人民。 碧桂園 森林城市嘅情況,我都可以肯定並唔會係最後一單。

發表迴響

你的電子郵件位址並不會被公開。 必要欄位標記為 *