關愛座

星期日休息: 關愛座 點解變咗批鬥座

九巴 關愛座 嘅設計人,喺 關愛座 爭議之後,終於出嚟講嘢,話 關愛座 目的唔係留俾老人家專用,亦表明,佢呢個目的,純粹提醒公眾,身邊可能有人有需要坐咁解。只不過,香港啲老人家,真係睬你都傻,我相信, 關愛座 會繼續成為批鬥座,縱使九巴原本設計 關愛座 果個人,已經講明,根本唔係咁用。有啲制度一旦行膠咗,係好難收得番,因為呢個係一個文化問題,而唔係你當初設計本意嘅問題。你本意唔係咁,如果文化出咗事,都可以變咗係另外一回事。

關愛座 變成批鬥座真正原因

關愛座 變咗批鬥座嘅原因,其實係十分之華人嘅文化問題,就係恃老賣老呢種惡劣文化,喺華人社會一直都存在,由政治上必須聽啲所謂元老講嘢,到所謂 關愛座 ,都係反映一樣嘢,老人大晒,話知之年青人死活,而且呢個問題,唔只係喺 關愛座 ,或政治傳承上發生,辦公室、政黨、學術界全部都係咁,華人社會一直都建立唔到實力主義嘅傳統,靠嘅唔係人際關係,就係年老大晒,呢個係所謂世代之爭嘅核心所在。所以,喺西方社會唔會有問題嘅關愛座,喺香港、台灣等地,竟然變成一種公害,亦都係呢個原因。喺德國,你讓座俾老人,有時老人寧願唔坐,唔係禮貌問題,而係一個慣咗實力主義傳統嘅地方,接受一啲唔應該接受嘅禮遇,只會係一種恥辱,問題係,華人嘅老人家,何曾有呢種榮辱之心。喺華人社會,所謂榮譽從來都唔喺傳統之內,如果果個地方係重視榮譽,就唔會有咁多五毛,甚至一啲人做嘢係明明做衰嘢都唔會覺得自己係有問題,呢個就係無榮譽心社會嘅問題。

所以要解決 關愛座 變批鬥座嘅問題,唯一方法係取消關愛座,唔會有其他方案,因為依家香港好多老人家,都係無果種榮譽觀,更加唔好講中國南嚟果班移民,所以至會搞出關愛座呢個大頭佛,而要改變老人家諗法係極難,因為佢地嘅年歲,而以華人社會嘅思維方式,好少老人家再可能接受到新思維,所以取消關愛座,直至依家呢代老人家逐漸老去,受過關愛座之亂之苦嘅人變成老人家,屆時引進關愛座反而少好多亂源,當然,前提係香港當時已經回歸英國,而果啲受中國嚴重影響果批人,已經得到適當嘅處理,至少應該點處理,我唔會喺免費版講,都係果句,賊太多。

當然,老人家駛唔駛搭車,佢地當然要搭車,但呢個責任,唔係要年青人讓座去承受,好似小巴,如果有低地台小巴,係唔係會減少老人家要喺巴士爭關愛座嘅問題,因為香港小巴係唔准企嘅,至少多一種交通選擇。有啲鐵膠以為乜叉都可以鐵路解決,大佬,依家香港啲鐵路站設計係就地產商炒樓,你試做老人家行港鐵西營盤站,或香港大學站,點行呀,真係狂搽Voltaren Forte都搞唔掂果啲情況,所以佢地至要坐巴士或者小巴,甚至對老人家嚟講,可能係需要類似Uber嘅服務照顧接送,你叫香港啲的士司機某程度上負擔起老人家,特別行動不便老人家啲交通服務,你發夢喇,香港啲的士司機無拒絕老人家搭車,已經係上帝保祐,以依家香港的士業界全面腐敗嘅情況嚟睇,否則點會香港Uber仍然會咁hit至得㗎,你話係唔係?

香港啲老人家仲有一個問題,就係勝利友主義,有權話乜都啱,民建聯或陳凱欣講兩句都話啱,然後投一班會害佢地嘅人,呢個亦係香港年青人無乜興趣提出社會改革去幫佢地嘅原因,呢個亦係關愛座問題變得特別火爆嘅背景。香港老人家應該諗清楚,當權果個唔一定講嘢啱,特別依家當權呢班友根本係賊嚟,唔用個腦諗清楚自己每日面對嘅問題,走去支持民建聯或工聯會嘅,呢啲友仔係自己抵死有餘。如果香港啲老人家唔係搞勝利友主義,相信好多人願意類似我上一段講嘅社會改革,甚至可能用科技去解決,例如老人家去覆診果陣,可以將覆診時間,同埋交通接送安排一併安排妥當,呢個就已經減少咗唔少公共交通服務嘅負擔,甚至喺一啲人口老化嘅區域,呢啲接送安排,係可以智能咁安排,邊個唔得,你醫管局肯唔肯做功課之嘛,講到尾。技術係有,不過政府班友個腦只係諗住搶香港人嘅錢。

另:我知為正策士有人like咗我個page,我會不日remove土共嘅like,呢度唔歡迎土共抄橋,我講明在先。有部分人,我已經踢走咗。

發表迴響

你的電子郵件位址並不會被公開。 必要欄位標記為 *