高鐵-水浸-min

高鐵 水浸成咁仲可以通車?

對於一個鐵膠嚟講,仲要喺德國已經成日坐ICE或RE穿梭唔同城市嘅鐵膠,我覺得我啲朋友喺香港夠膽坐 高鐵 試車,係藝高人膽大。而譚文豪MP篤爆高鐵香港段隧道水浸,大佬浸成咁都可以通車,炒車都可以炒死你,叫梁振英日日坐就差唔多。

高鐵 水浸有乜問題

我用車務技術角度,同建築技術角度去解呢件事有幾危險,先講車務, 高鐵 香港段用係CTCS3標準嘅訊號系統,呢個係ETCS Level 2嘅中國山寨版,基本上,列車嘅位置數據,仍然要靠路軌上嘅Eurobalise去回應(當然比起ETCS Level 1減少咗對Eurobalise嘅依賴,呢個亦係可靠高速鐵路嘅重要技術嚟),雖然大部分車務訊號都可以靠GSM-R無線電訊號控制,水浸成咁Eurobalise失效,可唔可以造成一個準確而安全嘅閉塞(blocking),我好有疑問。跟住如果滲水滲到出鐘乳石,我想問GSM-R同控制中心之間嘅地面電路,仲係唔係可靠?訊號系統故障,小事係成日delay,大事係撞車,無錯係撞車,仲要隧道裡面炒車,乜大家仲唔記得果單列車追撞事件?而且和利時啲嘢係有問題,根本係山寨嘢,你敢用?

然後建築上,到依家都可以滲水滲到失控,我想問成個隧道結構會唔會有日突然崩潰倒塌,屆時你真係喺地底被活埋都得,喺建築物安全係一個疑問果陣,根本中國高鐵係唔可以通車,更加唔好講會唔會有沉降,沉沉吓沉到有大廈結構出問題,好似沙中線咁樣,呢啲梁振英時期嘅工程,基本上都係唔要得,所以中國高鐵香港段,根本要停止所有試車安排,並且無限期擱置通車,直至安全問題解決為止。特別一地兩檢下,隧道同列車範圍已經係技術上嘅中國領土,如果有人要唔令列車被撞真相被查,或者阻止香港死因庭聆訊追查事件真相,中國方面連車帶屍強行搶走你都吹佢唔脹,睇得多中國新聞,中國官僚為咗唔想被人知衰嘢,走去搵成棚公安搶屍呢啲仆街嘢,你估我見得少咩。

所以都係果句, 高鐵 你坐埋我果份,由頭到尾我都係反對呢項工程,亦係咁解。

發表迴響

你的電子郵件位址並不會被公開。 必要欄位標記為 *