健吾-日本集合-min

健吾 間日本集合幾時執咗佢

果啲亂抄內容嘅Content Farm乞人憎,呢個一早都知,但身為一啲「名人」,走去搞內容農場仲要亂譯廿四,咁又點呢? 健吾 俾咗一個好好嘅例子,就係俾識日文同日本嘅鬧爆,而 健吾 仲要死撐,日本集合適唔適合大家睇真係見人見智。

健吾 檔日本集合有乜問題

本來 健吾 叫做對日本有啲心得,然後自己每日寫個日本分析blog,日本文化blog,再收廣告,甚至收埋訂閱費,呢個我從來都唔反對,甚至我推廣呢種經營模式添,等獨立評論人,或一啲小眾內容可以生存。但 健吾 搞咗一檔乜出嚟,就係將日文傳媒嘅嘢求其譯,求其抄,炒埋一大碟,然後呃啲愛好日本嘅人嘅click,呢啲叫內容農場就係咁解,我想問, 健吾 果篇連朝日新聞嘅報導都譯錯同抄錯嘅文,提供咗乜嘢insight俾大家咁?結果成件事係自暴其短,同佢老友倫敦人西卓澄亂寫英國一樣,引嚟大批真係住過當地,或喺當地生活過嘅人媽到九彩。 健吾 同倫敦人西卓澄兩條友,根本衰法係完全一樣,只不過一個有中大教席,兼且有啲名人老友保住上,但講真,我都主持過光明頂,我都教過中大,會唔會有啲嘢因此認為自己香一啲?咪玩喇。

我自己係南洋人,都唔夠膽整個南洋集合之類內容農場,一方面,怕啲人對南洋造成不良了解,反而唔好,呢啲所謂「Hub」好易睇嘢以偏蓋全,營養不良,另一方面,如果你係針對唔係住喺當地嘅人,提供當地文化或新聞嘅理解,唔該你消化咗成篇新聞,然後作出同香港或其他國家,至好出嚟寫,否則你唔係推廣當地文化,你只不過同大榴槤一樣呃like同呃click,係一啲意思都無。

香港依家最大問題,就係出埋晒好似鍾樂偉、 健吾 呢啲靠抄而起家嘅半桶水專家,一般唔識double check嘅讀者俾佢昆咗都唔知,如果話了解日本文化,我寧願大家多睇日本漫畫,真係學好日文好過。我喺德國住一年,我自己睇同聽德文,當然辛苦,但有時都好過德國之聲中文啲二手嘢。我無論喺香港、台灣、新加坡寫嘢,我都係強調我充分了解我受眾所在地方,同我寫嘅對象後,充分消化至起筆寫。我呢度出文,一定要有insight,無insight就唔好寫。 健吾 不如執咗日本集合,或者仲可以留得住佢自己個朵。

發表迴響

你的電子郵件位址並不會被公開。 必要欄位標記為 *