新加坡-NDP2018

星期日休息: 新加坡 NDP 2018 五位傑出國人進步價值再與香港相比

我講過新加坡國慶大會片段,代表建國一代華族成員嘅,係用粵語原裝演繹,呢個係反映新加坡語文政策嘅轉變,但係五位傑出國民嘅身份,亦反映咗 新加坡 依家李顯龍政府開始推廣嘅進步價值,同香港相比,香港明顯係嚴重倒退,不知所謂。

新加坡 唔係一味實用主義至上

啲人話李顯龍同李光耀係一樣搞威權,但我係唔同意,李顯龍你聽佢啲訪問,都知佢係好熟西方,特別英國民主果一套,佢係好大程度上為咗 新加坡 嘅身份建設,以至社會價值觀作出調整,今年五個代表,我簡單介紹

歐族:Mary Klass,荷蘭葡萄牙混血,1956年代表當時新加坡自治領(海峽殖民地最後一部分)參與奧運,建國一代(大家可以對照1996年代表英屬香港攞到奧運金牌嘅李麗珊)
華族:胡潤心,當年為生活遠渡南洋,即係講粵語果位婆婆,建國一代
馬來族:Mashruddin and Nizar,街頭藝人,長期喺街頭表演音樂超過四十年,事業父傳承子,他們直接喺國慶大會舞台上演出
印族:Veera, 新加坡 喺綠色規劃上嘅專家
華族:蔡寅州,佢成立社會企業,為嚟自孟加拉等國嚟外勞免費剪頭髮

大家由呢五個人選,你應該知道 新加坡 打算喺國慶大會傳達乜嘢訊息,你比較番香港依家嘅處境

1. 新加坡 承認新加坡英治年代嘅光榮同歷史,包括自治領年代,更加唔好講明年慶祝萊佛士開城一百七十週年。香港,偏偏有人要抹殺英治年代一切歷史,亦唔承認非華裔國家英雄對香港貢獻,Mary Klass 係荷葡混血,你有幾何見到香港咁做?
2. 新加坡 打算承認粵語地位,香港打壓粵語地位
3. 新加坡 承認真係做得好嘅街頭賣藝人地位,香港係縱容中國大媽亂嚟,同埋喺西洋菜殺街
4. 新加坡 注重綠色規劃,香港係離晒大譜,仲要去填海
5. 新加坡 係連孟加拉等國外勞都係關注,香港依家李梓敬果啲友仔仲講乜嘢南亞假難民,對我呢個南洋人嚟講,我聽到簡直係離晒大譜。

呢個就係 新加坡 面對馬來西亞變天大變局嘅回應, 新加坡 面對馬哈迪嘅馬來海嘯迎嚟嘅希望聯盟政權,以及中國即將解體等壓力,新加坡唔係再用過去果套,其實你睇到呢一段,同埋工人黨國會議員被邀成為國立新加坡大學畢業致詞嘉賓(以往只有行動黨籍議員,你見泛民議員喺香港公立大學畢業禮演講未?), 新加坡 將會係以漸進方式去完成全面民主國家最後一段路去回應時代嘅挑戰。雙城一比,你就知道香港班土共係如何禍害香港,將香港嘅價值倒退過嚟,呢種行為係十分之可恥。

香港啲權貴好奇怪,一方面成日想學新加坡,想有新加坡政府果種權力同威望,但又唔願意面對新加坡果種學習面對民主挑戰嘅現實,喺馬共不復存在後,其實新加坡少咗好多選區劃界上玩法,至少新加坡無諗用選區劃界攞番後港以及阿裕尼集選區,甚至新加坡政府嘅YouTube頻道,已經擺咗唔少劉程強同林瑞蓮嘅質詢片段上去,等大家知道反對派原來係有做嘢,兼且做得唔錯,香港政府依家做緊乜,梁振英只不過係一個打唔過人就用仆街招數嘅小人,一係玩飛象過河,一係搵埋啲賤人搞小動作,跟住乜都唔識,我由1999年後開始幫聯合早報寫政治評論,今年已經19年,過去19年我睇到嘅變化係,南洋嘅改變已經出現曙光,但香港好明顯係走向黑暗,呢樣嘢係我最神傷。我喺香港花費時間係最多,但香港所寫所做往往最後係徒勞無功,呢個問題,就係香港當權一代嘅人立心不良,以為完全無一個為香港人負責嘅心,新加坡你點講都好,新加坡朝野保持李光耀確立嘅傳統,從政者必須為新加坡負責,當有呢個心果陣,政府一切所做就離譜有限度,一如英治年代嘅香港政府,係一個為香港人負責嘅政府,否則當年嘅香港政府,唔會喺FCO檔案中得到 Republic of Hong Kong 之名,香港無自治領之名但有自治領之實。

當黃元山仲講緊學 新加坡 填海果陣,點解唔學人地真係進步嘅嘢,包括海水化淡、到喺國慶承認粵語嘅地位,承認街頭藝人對國家嘅貢獻,運動員對國家嘅貢獻等等。仲有一樣嘢,董建華應該自我反省一下,佢喺香港做咗啲乜,如果佢繼續要拉香港後腿,香港人係唔會對團結香港基金呢班友客氣嘅。

One thought on “星期日休息: 新加坡 NDP 2018 五位傑出國人進步價值再與香港相比

  1. 新加坡果諗法係唔同,李光耀回憶錄已經講得好清楚,佢希望萬一選民對行動黨不滿到要政黨輪替果陣,替代既政黨都係一個同行動黨路線唔差得好遠既黨,咁樣新加坡真正只係「換個名牌」,冇咁大震盪。而劉程強同工人黨亦正係行呢個方向,於是呢十年黎先會開放政府精英去參加反對黨。其實李顯龍只係手法同老豆唔同(相對冇咁霸道,事實上佢冇開國之功、新一代亦唔會接受佢霸道),但大方向係一脈相承。

    你用一個純粹靠背後槍桿子支撐,施政重點係刷鞋而非向市民負責既政府比,係侮辱左李顯龍。:P

發表迴響

你的電子郵件位址並不會被公開。 必要欄位標記為 *