新加坡-NDP2018

新加坡 :第一個粵語國家?

2018年8月9日 新加坡 國慶大典,香港人好多人都唔會關心,但喺當中一個環節, 新加坡 政府作出極其重大嘅政策宣言,喺語言問題上。粵語,即係呢度叫香港語文,成為國慶大典代表四大種族(華、巫、印、歐)片段,華族部分嘅語言係原裝粵語播出,不單感動人心,而且係代表一次重大政策轉變,我相信重要程度,不亞於當年霧鎖南洋。

新加坡 抵禦第二次唐山入侵

大家可以睇紅螞蟻呢個網站嘅介紹,以及片段選段,你聽胡婆婆果一段,我以為你自己喺香港,將婆婆果段,你想像一下日後香港有國慶大典,將會係一個點嘅場景。

都可以睇製作團隊為胡婆婆製作嘅粵語配音片段

新加坡 一直喺抵禦唐山入侵嘅前線,中國經常濫用同華裔嘅血緣關係抽水,甚至累及華裔,新加坡廣播局(今日嘅Mediacorp)拍嘅《霧鎖南洋》,以柔性勸說令上一代接受佢地係新加坡人,唔係中國人,果年係1984年,《中英聯合聲明》簽署嘅一年。

當年新加坡同時實施講華語政策,當然呢個政策,當年唔係錯,因為當年福建、廣東、海南等來源嘅人,成為互鬥,再加上英語教育嘅人,唔打到一塌糊塗就奇,李光耀嘅講華語政策,當時係正確。但時而勢易,中國依家用華語,再加上所謂華人血緣關係想入侵新加坡,令人擔心,而粵語一直喺 新加坡 保持通行,而香港、溫哥華、吉隆坡、倫敦呢啲城市,都喺抵禦中國入侵嘅前線,甚至比台語(閩南語)更能抵擋中國入侵,因為習近平尚且利用閩南語搞統戰,但粵語族群同中國嘅關係,已經十分之清楚,喺呢個背景下,新加坡嘅語文政策,出現完全想像中唔到嘅宣示,國慶大會出現流利粵語,粵語唔再係方言,或者係所謂工作語言,而係新加坡多元語言國家嘅一部分,正確嘅各族共同語,包括華裔係英文,華族再講華語造成嘅國家安全危機,亦實在太明顯,所以呢次係《霧鎖南洋》以嚟最重大嘅轉折。

同埋仲有一樣嘢,除咗英語,粵語係可以衝破族群、國籍,印族可以講流利粵語(香港利君雅咪係例子,喬寶寶都係)、歐洲裔可以(河國榮),馬來裔都可以(香港眾多印傭可以講粵語),呢個係比華語更能抵禦中國入侵嘅理由。

粵語成為南洋,甚至諸多英聯邦國家(香港、新加坡、馬來西亞、加拿大、英國、澳洲)其中一個共同語言,我並唔會意外。第一個粵語國家係 新加坡 ,誰說不可能。粵語,成為咗抵禦中國帝國主義嘅力量,呢個就係堅持粵語嘅理由。

5 thoughts on “新加坡 :第一個粵語國家?

發表迴響

你的電子郵件位址並不會被公開。 必要欄位標記為 *