QR Code-車票-min

QR Code 車票係唔適合有閘嘅世界

港鐵依家試緊接受 QR Code 車票,當然明顯係為支付寶入侵香港鋪路,喺德國, QR Code 或 Barcode 車飛好普遍,只不過,德國玩 QR Code 車票嘅原因,因為德國係無閘呢家嘢,當車站有閘嘅話, QR Code 車票就變智障車票。

QR Code 車票讀起嚟反應太慢

喺德國, QR Code 車票好通行,長途短途用手機買一律 QR Code ,但 QR Code 車票喺德國通行嘅前提係,德國絕大部分車站都係閘,月台係自出自入,要捉 Schwarzfahr (唔俾錢搭車) ,其實係靠查票員,而德國嘅票制複雜,紙本飛仲要查票員睇睇飛上嘅條款,仲有有無打validate嘅印,同個時間,用 QR Code 都讀得慢,但大致上都加快咗查票員嘅效率嘅,所以德國用 QR Code 反而合理,用八達通之類車票反而不設實際,嫌唔夠多膠咭咩,又唔係吓吓都會被人查票。

但如果你由德國坐火車去到荷蘭,你就知 QR Code 車票係幾白痴,荷蘭係 OV-Chipkaart 同 QR Code 兩者都受,但 OV-Chipkaart 好快入到個閘,仲要全荷蘭唔係用Sony Felica,而係用 NXP (以前飛利浦半導體部門) 嘅 Mifare , Mifare 保安上係無 Felica 做得咁好。而用 QR Code 呢,喺荷蘭Venlo,來往德國嘅火車係無閘,因為基本上坐都係德國人,整個閘唔知做乜,所以如果要轉車,如果你張飛嘅Barcode有問題,荷鐵人員人手check完飛,就俾張Key Card你走。你坐由德國嚟嘅ICE火車,就一定要喺阿姆斯特丹、鹿特丹等出閘,果個Barcode有好多時都係讀唔到,或者讀得慢阻住地球轉,結果係荷鐵嘅人員解救你。所以我喺歐洲生活經驗,對 QR Code 車票呢家嘢,係有高度質疑嘅態度,因為呢樣嘢,根本唔啱香港呢啲有閘嘅世界用,中國用 QR Code 車飛,係根本唔想喺車飛系統上,經過日本或荷蘭公司專利,咪就玩呢啲嘢。所以港鐵走去學人玩 QR Code ,浪費時間同錢應付馬雲、馬化騰呢啲賊,真係唔知做乜。開放VISA、Mastercard Contactless Card搭車好過喇。

3 thoughts on “QR Code 車票係唔適合有閘嘅世界

  1. 其實就算德國用八達通都可以加快查票的。正如港鐵都有單程車票一樣,既然德國冇閘,如果想鼓勵乘客交回車票,預收按金就行了。例如十蚊,車站出口有部機可以塞票入去退番十蚊咪得。如果係平時搭既人都用月票,咁梗係唔使退票,自己每個月去更新張八達通就得。

  2. 德國所有車站用honour system(長途車加車上查票),設計上從來冇位預你安閘,一加閘就會有樽頸位。

    不過英國都炒埋手機QR Code出閘(英國近年大站加返閘機打擊逃票同減少車上查票人手),有片睇效果其實未必差[1] 。但另一方面我米蘭手機賣一日票,根本閘機上掃描器讀唔到,要職員人手畀我通過。

    港鐵都知QR Code唔係萬能,所以張閘機新單話會收埋感應式支付[2],即PayWave, Apple Pay, Google Pay全食。

    [1] https://youtu.be/vBm0ppXnOis
    [2] http://www.mtr.com.hk/en/corporate/tenders/C3025-18E.html

發表迴響

你的電子郵件位址並不會被公開。 必要欄位標記為 *