盧凱彤-黑狗-min

盧凱彤 之死睇政府承認同性婚姻嘅重要性

有一個由 盧凱彤 之死引發嘅議題,我相信香港好多傳媒根本唔敢講,但對 盧凱彤 家人嚟講,其實係十分之重要,就係 盧凱彤 生前果段同性婚姻,喺香港嘅法理效力問題。因為香港被一班耶X騎劫,政府拒絕承認海外同性婚姻或民事結合,甚至不惜同入境處官員打官司,依家喺民事上搞出好多問題,呢個係必須拎出嚟講。

盧凱彤 另一半喺香港法律乜嘢都唔係

盧凱彤 突然離開人世果陣,佢父母尚在人世,所以法律上,所有嘢,包括一旦無遺囑情況下嘅財產處理,都係俾晒父母,但如果大家諗吓一個情況,如果 盧凱彤 呢件事發生果陣,佢父母兄弟等都不在,喺人世間親屬只剩低佢嘅另一半,叫老婆又好,叫老公又好,但依家香港法律係唔肯承認任何同性婚姻或民事結合嘅法律效力,咁點呀,政府食晒佢啲嘢,同一個無親屬孤伶伶嘅人無分別,呢啲係唔係蔡志森、梁美芬呢啲濫用耶穌基督之名作惡嘅友仔想見?依家香港喺同性婚姻呢個問題上,明顯係被班宗教極端人士騎劫到不合情理嘅程度,用嚟統戰果班愚蠢嘅極端基督徒。

香港行唔行同性婚姻,或相對無咁激嘅民事結合,係可以討論,但至少一點係,必須尊重第二啲國家政府嘅婚姻制度,至少海外同性婚姻以及民事結合係必須承認,外國行乜婚姻制度,關你香港政府叉事,更加唔關明光社以及梁美芬呢啲人事,如果香港係作為一個多元種族,有唔同國籍人士居住嘅城市,就必須承認海外合法獲承認嘅婚姻或民事結合安排,除咗兒童領養因為涉及太多宗教同倫理學問題爭論,可以姑且擺低外,喺財產繼承、福利、危難果陣醫療決定等方面,應該同異性戀嘅婚姻所享有嘅安排一致,否則出現類似 盧凱彤 嘅不幸事件,另一半因為果啲古老石山法律,連幫另一半走埋最後一段路都有諸多障礙,呢個係十分之唔公道嘅事,而呢個係傳媒有責任去講,但我依家睇到一樣嘢,全部傳媒一律收口,好似當 盧凱彤 生前結咗婚另一半嘅權利係隱形一樣。

香港係時候承認海外嘅同性婚姻以及民事結合,香港自己搞唔搞一回事,但唔該顧番現實同人性需要,香港太多信教信到連基本人性都無嘅人。

發表迴響

你的電子郵件位址並不會被公開。 必要欄位標記為 *