吉林糧食-min

吉林糧食 破產:中國啲糧油企業逐個爆

喺禮拜六,喺中國瘋傳吉林糧倉失火,依家就嚟單堅料,就係中國最大玉米交易商 吉林糧食 破產,當然表面理由係貪腐問題,貪腐問題已經係中國常識,但係最大玉米交易商都破產,其實反映依家嘅大鑊程度,所以我將星期日休息調遲推出,先講呢件事。

吉林糧食 點可能破產

中國有糧食進出口經營權嘅大國企得幾個, 吉林糧食 係其中一個,另一個就係中糧集團,即係搞到美斯無波入果個蒙牛集團嘅母公司,頂級大國企嚟,仲有一個,就應該就係北大荒,依家 吉林糧食 爆咗機,你覺得有乜事會發生?但可以肯定係,將 吉林糧食 執咗佢,會少咗一個重要走資渠道,究竟有幾多外匯經 吉林糧食 以進出口糧食為名走咗出去無人知,呢個已經係一個好多人想知嘅疑問。

但仲有一個好大嘅問題嚟緊,就係 吉林糧食 呢單嘢,係唔係有人炒燶咗國際期貨市場,如果係咁出事就無咁簡單,咁就唔只 吉林糧食 會爆,其他中國人有幾人炒期貨炒燶咗然後一鑊泡,就咁真唔知。本來中國嘅糧油公司,無論出口定入口糧食,都有責任買糧食相關產品嘅期貨,但買期貨目的唔係用嚟賺錢,而係用嚟對沖風險,簡單嚟講,係買保險。你會唔會期望你買保險有得賠?我估你都唔想有得賠,因為保險往往係用嚟令你輸得無咁甘,但你嘅目的,並唔係果筆賠償。依家賭期貨班友,往往係本末倒置,係藉賭喺賺錢,仲要係好大筆錢,好高賠率咁賭,你覺得果啲賭徒最後保得住身家,亂咁賭期指果啲人,最後都無好下場,唔好話乜。我亦未聽過有人係賭期貨賺錢,賭到無錢賺就有,國泰航空咪典型例子,但國泰航空有相當強嘅流動現金收入,輸都唔會輸咗間公司,最多係果年白做咁解,但 吉林糧食 以至中糧之類公司係唔係,我唔係咁睇,中國同美國嘅貿易戰玩到咁,又遇上今年最黐線嘅夏天,啲以為自己有內幕消息嘅公司,係唔係賭到出咗事,我真係相當之懷疑。

所以 吉林糧食 爆,唔係一件小事,依家支爆係現在進行式嚟,一間接一間大國企咁爆,你覺得香港唔會有事,你覺得中國經濟仲係好強,如果係咁,祝你好運,依家只不過係頭盤。

發表迴響

你的電子郵件位址並不會被公開。 必要欄位標記為 *