香港郵政

香港郵政 邊有競爭力?

近排收到一份香港嚟嘅郵件,我循例都會留意 香港郵政 依家嘅收費水平。唔睇由自可,一睇嚇親自己,乜話,一份寄嚟德國嘅300g packet,無掛號收60.5HKD,相等於6.65 EUR,咁仲貴過德國郵政DHL,有無搞錯。

香港郵政 搞到咁鬼貴做乜?

同樣一份郵件,如果係德國寄返香港,一般用GrossBrief嘅收費水平,如果無做掛號,500g做上限,係講緊 3.7 EUR,如果你係齋貨,我們叫 Warenpost International,係3.2 EUR,掛號另加 2.5 EUR,即係咁講,如果係做 GrossBrief 加掛號(Einschreiben),係 6.2 EUR,即係 56HKD,大佬,如果德國寄嚟唔做掛號,價錢差一倍,點解香港郵政可以搞到啲收費貴到呢個水平。究竟香港郵政發生乜事,係唔係應該考慮香港郵政私有化嘅問題,呢件事係值得再度攞出嚟討論,當然前提唔好搞到好似領匯上市咁,或香港郵政落入順豐、中國郵政之類公司手上。

香港郵政 咁貴,一方面 香港郵政 好多員工係公務員,公務員員工本來貴一截,Deutsche Post DHL唔少服務已經係外判,特別係大件郵包,因為大件郵包係用DHL Paket名義營運,係同UPS、GLS呢啲公司競爭。但另一方面, 香港郵政 係唔係真係以商業原則運作,我十分之懷疑,德國郵政已經唔係最識得以e-Commerce搵銀,但Deutsche Post嘅系統都有夠十足清楚嘅API,可以直接買Internetmarken(電子郵票),然後電子CN22表格(PDF表格,方便你做嘢),只要一部Dymo LabelWriter已經好方便處理貨件,喺香港,乜有呢啲tool架,浪費郵局人手,亦浪費啲人自己嘅人手,我唔明依家 香港郵政 班友嘅經營方式,仲要依家啲友仔成日delay,就更加唔駛講。

所以我依家賣嘢都係德國直送,因為改喺集運到香港再搵人派,又慢又貴到傻,何必呢?但 香港郵政 反映一樣嘢,香港並唔係乜嘢物流中心,大批中國人嚟香港寄嘢,係因為中國郵政更貴更聲名狼籍咁解咋。

2 thoughts on “香港郵政 邊有競爭力?

發表迴響

你的電子郵件位址並不會被公開。 必要欄位標記為 *