胡鞍鋼-min

胡鞍鋼 呢班新左派吹牛吹過火係時候收聲

依家貿易戰玩到真支爆,習近平係時候搵啲人嘅頭,特別啲假國師個頭出嚟切,而 胡鞍鋼 呢位中大政政系讀中國政治嘅人,多少會睇過佢啲書嘅學者,由於吹得太大,話中國趕超美國,依家終於出大鑊嘢,有人迫宮要佢祭旗。我估除非政政系王紹光請佢過嚟香港教書,否則佢應該係咁先。

胡鞍鋼 吹牛過火兼且搞出地方債

胡鞍鋼 同王紹光同屬中國新左派,成班美國讀書返嚟嘅左膠,而《中國國家能力報告》基本上係研究中國當代公共財政同行政嘅必修書籍,因為你同意唔同意佢都係,基本上 胡鞍鋼 同王紹光度出嚟嘅嘢,就係今日成個中國公共財政制度嘅運作邏輯,將聯邦制嘅嘢溝入一個非聯邦制國家裡面,行咗廿年依家炒車,仲要唔係一般果種炒,地方政府孭大量事權而無財權,乜事依靠果個所謂「轉移支付」制度,地方有權無錢,自己搵錢終於玩到失控,乜嘢土地經濟,拆遷亂拆廿四呢啲,全部同 胡鞍鋼 度出嚟嘅嘢有關,2018年3月分稅制至叫做結束。其實 胡鞍鋼 搞出咁大個大頭佛,仲好意思周圍扮國師,習近平唔想郁佢就出奇,佢係醒嘅話就乜聲都唔出,但依家係 胡鞍鋼 以為自己搞出嚟果套好了不起,走去講五毛一樣嘅嘢,以為擦到鞋兼為自己貼金,點知係得罪方丈。所以呢次,係習近平師出有名,清除一啲製造麻煩嘅人,而 胡鞍鋼 被要求辭去清華大學教席只係第一步,如果有人有佢啲黑材料,我相信有人攞果啲黑材料郁佢,呢個亦係點解我話,依家除非佢老友王紹光,請佢嚟中大政政系教書,仲要香港保得住一國兩制,否則 胡鞍鋼 同埋成班新左派,以為習近平上台後有運行,但睇怕呢班友遲早全部攞晒去清算,由佢地為依家搞到貿易戰一鑊粥負責。

胡鞍鋼同埋佢同一代好多中國政治同經濟學者,由1989年北京大屠殺以嚟,除咗趙紫陽嘅另一位左右手吳國光,係能夠堅持做番個人,無走去投共外, 胡鞍鋼 、王紹光、甘陽(香港人唔識甘陽,但會識佢老婆潘潔,潘潔之前係環境局副局長,依家潘潔都係喺清華大學公共管理學院教)、崔之元、鄭永年,一字排開成棚都係歐美頂級大學嘅學者,但做都係幫呢個政權拍馬屁嘅事,中共一向當知識分子係避孕套咁用,我真係留名睇清華大學公共管理學院被人清檯收場。呢班友過去廿幾年,享受係國師級待遇,但大家會點樣睇呢班人,大家心裡有數。

(有人問我會唔會讀番博士,或者會,反正我人喺德國,如果生意上咗軌道,德文okay,我可能喺德國讀番政治學博士,只不過叫我返嚟香港教書就咪搞,喺德國好多Dr.都係做公司老闆唔教書,香港社科界江湖險惡,加上個人生性粗魯,教書唔係我杯茶。)

發表迴響

你的電子郵件位址並不會被公開。 必要欄位標記為 *