小巴牌-銀行-min

小巴牌 泡沫爆破:只不過係開始

近日,有傳有啲 小巴牌 因為斷供,搞到被人拖走。政府一味搞鐵路主導政策,又無諗住收拾 小巴牌 呢個被中國人搞出嚟嘅泡沫,依家紅van第一個死,跟住如果仲有其他 小巴牌 斷供搞到被拖車,然後搞到公共交通大亂,我都唔知點。但呢個只不過係開始,更大鑊仲嚟緊。

旅遊巴牌大鑊過 小巴牌

小巴牌 同的士牌一樣,喺法律上係可以轉讓,雖然 小巴牌 如果搞到負資產收場,銀行撇帳都會好甘,但喺帳目上,果啲資產仍然有市場,就會有價,咁銀行死唔晒,只不過,係盤數難睇,同埋搞出咁多P&L出嚟,好多銀行職員要起身咁。但旅遊巴牌出事,就大鑊好多,因為法律上,A passenger service licence shall not be transferable,無錯,以旅遊巴身份出嘅非專營巴士客運營業證係不得轉讓,我唔知金管局邊個壽頭可以俾銀行抵押非專營巴士客運營業證資產,但一旦斷供,係一堆無法交易嘅資產被沒收,我想問同無抵押貸款有乜分別?咁X大筆無抵押貸款default咗,銀行堅係跳海都唔掂。

所以 小巴牌 泡沫爆破,好快的士牌都泡沫爆破,成筆成筆撇帳夠銀行好受,因為以數以百億港紙計,大家諗吓銀行啲呆壞帳準備點算,一味顧住港鐵唔顧吓銀行放幾多數,呢鋪政府仆街唔駛講,但更大鑊嘅事係旅遊巴牌泡沫爆破,依家旅遊巴又唔交易得,所以運輸署做轉名根本係唔符合香港法律,咁可以點?我依家留名食花生,睇金管局同運房局點樣互相問候對方娘親,究竟搞出咁大個大頭佛之後點收科,呢度講緊幾十億港紙呆壞帳。

我識果啲銀行人,依家佢地對自己下年份工仲保唔保得住十分擔憂,亦都係呢個原因,小巴、旅遊巴、的士爆煲,一堆負資產,跟住樓市爆煲,又一堆負資產,咁多呆壞帳負資產,去到支爆級果陣,你覺得金管局做果啲所謂Stress Test真係有Stress喺度?依家所謂Stress Test都係安慰一吓自己,實際對保證銀行唔會爆煲呢樣嘢係一啲幫助都無,政府如果醒嘅話,應該同銀行傾傾發生乜事,或者停咗一味向港鐵傾斜嘅政策。港鐵賺少個崩都未必死,但成堆車斷供銀行一定慘死,呢個就係政治現實。

發表迴響

你的電子郵件位址並不會被公開。 必要欄位標記為 *