360HK-min

360HK 股票借貨黑吃黑事件

Stock Loan呢家嘢,如果唔係留意開香港細價股啲古怪嘢,都未必知係點嘅一回事。但蘋果日報很奇怪,報導有人玩 Stock Loan 黑吃黑中伏事件,最好笑係苦主居然敢認頭,而 360HK 呢間公司又居然入到呢個遊戲至得意。

360HK 嘅來頭無咁簡單

首先,細價股好多古怪嘢,好似 Stock Loan或者Bought and Sold Notes 交易等,呢啲嘢,一般係細圈子到爆嘅交易,未知個個會知乜事,總之大家嘅原則係細價股咪掂,否則遇上大莊家車貨就車毀人亡果隻。同埋呢啲交易,多少有灰色地帶,所以大家唔會講得好揚,雖然證監會都知呢啲游走灰色地帶嘅交易存在,果個真係有啲似華爾街狼人嘅世界。只不過,亦由於呢個圈子嘅性質,照計唔係咁容易無啦啦入到去個圈子, 360HK 居然搵到貨源,搵到水魚,仲做埋單刁,真係一般猶太佬搞得掂嘅事,我個人唔多信,因為好少外資佬玩呢家嘢(唔係無,實有嘅),所以 360HK 係唔係咁簡單,我個人存疑,呢班大帝應該後面有熟悉情況嘅人。

至於Due Diligence,呢家嘢好難嘅,唔係啲債仔莫財嘅問題,而係Stock Loan本身已經係灰色地帶,跟住呢幾年中國人玩細價股玩得咁多仆街嘢,乜嘢匪夷所思嘅手法都有,個個為求做到生意,都會玩呢啲多少喺灰色地帶嘅遊戲,邊個揸正嚟做做Due Diligence,所以中伏係正常,搞得唔好,果啲猶太佬隨時都係演員嚟,幕後真老闆係邊個,你鬼知咩,特別果啲文件玩法,佢地係連啲香港大鱷身邊嘅律師都玩埋,就知道呢班友唔係乜嘢善男信女,而且係十分之熟行頭玩乜。所以呢單嘢想攞番啲股票固然難,但佢地究竟係乜嘢人馬,果啲至係最難估嘅地方,所以金融本身都唔係人玩。

呢啲黑吃黑事件,大家可以食吓花生,恥笑吓人,只不過果啲細價股,就真係無必要去掂佢,因為香港嘅金融市場,一早俾李小加條友搞到同賭場一樣,仲要係乜嘢江湖規矩都無嘅賭場,依家藍籌都未必係正常人玩,更何況細價股。所以強積金呢樣嘢係無恥,亦係咁解。

發表迴響

你的電子郵件位址並不會被公開。 必要欄位標記為 *