警察-好人

警察 唔係個個好人只不過市民常識

發展局局長呢個位,照正常好難講人話,但黃偉綸講咗句人話, 警察 唔係個個係好人,仲要係東野圭吾小說嘅名句之一,都被警察員佐級協會抗議,黃偉綸被迫道歉。呢句嘢,黃偉綸無必要道歉,以依家 警察 紀律之差,無話警察都唔係好人,已經係十分之好彩。

警察 根本係無法無天

先唔講香港 警察 近幾年喺群眾集會執法不公兼濫權果啲仆街嘢,先講現役警員犯罪,依家搞到休班警、當更警、輔警鬥多犯罪數字,身為執法人員,知法犯法係罪加一等,呢個係常識,喺西方民主國家, 警察 咁多被捉到兼職做賊嘅,一早政府指派獨立人士或委員會調查警隊出咗乜嘢事,並且向首相或內政大臣提交報告,點會依家一路都係由得班警員繼續犯罪算數,簡直係荒謬無恥。都仲未計果單經典到震嘅旺角警署強姦案,你試吓喺英國發生呢啲事,由內政大臣到倫敦市長,全部都可以唔駛玩,更加唔好講係警務處處長,一哥係一早被人炒咗十世,根本唔可能好似近兩位警務處長囂張跋扈到呢個程度,市民認為 警察 唔係個個都係好人呢個印象,好大程度就係因為香港 警察 目無法紀所致。

東野圭吾嘅小說,講 警察 唔係個個都係好人,點解會咁,因為日本警察曾有一段時間聲譽好差,為求破案,不惜老屈,有啲死刑案件一直唔敢行刑,因為啲證據有問題,好多係要上訴再上訴,好似マルヨ無線事件咁,個犯已經坐咗四十七年監,搞到係七次上訴(係七次),點解玩到七次,梗係有司法不公。日本嘅刑求問題,一直係日本司法制度嘅重大污點嚟,呢個亦係點解日本處理死刑犯,唔可能好似美國咁手起刀落。好彩香港依家無死刑,否則點香港 警察 果啲老作口供,上庭夾口供呢啲無賴行為,冤獄一定多到懲教署啲官日日撞鬼都唔得掂果隻。依家香港 警察 根本唔係服務為本,係政權為本,一味靠惡,變番有牌爛仔,做過保安局嘅黃偉綸,佢對依家警隊掂唔掂,應該比其他官有更深刻嘅了解,依家嘅警察,根本唔係路,已經唔駛講喺公眾集會期間果啲濫權行為。

警察 唔係個個都係好人,只不過係常識, 警察 員佐級協會班友嘅作為,只係反映呢隊警隊,一旦有主權變更,必須炒晒大部分嘅人,重新嚟過,好似RUC(Royal Ulster Constabulary)變PSNI(Police Service of Northern Ireland)咁。

仲有,鬧警隊不公,彭定康比阿水都有資格,唔只佢係前港督,將RUC改到變PSNI果個,正係彭定康。

發表迴響

你的電子郵件位址並不會被公開。 必要欄位標記為 *