Mesut Özil-min

Mesut Özil 係無資格學人我討厭政治

Mesut Özil 可以講係德國國家隊惹火人物,喺一個無乜新聞嘅禮拜日,佢用英文寫長篇大論講點解佢退出德國國家隊,喺呢個乜都會同政治拉上關係嘅國家, Mesut Özil 嘅聲明簡直係炸彈嚟。而作為一個睇政治多過睇波嘅人, Mesut Özil 要退出德國國家隊,隨便,佢生於德國,受教育於德國都唔知Erdogan係仆街,係政治上不可接近人物,我救唔到佢。

Mesut Özil 知唔知自己衰乜?

本來德國土耳其裔人同德國人關係唔係差,本來最推動土耳其入歐盟,其實就係德國。但呢幾年德國同土耳其嘅關係惡化得好快,原因係Erdogan,大家都知Erdogan完全背棄現代土耳其國父凱末爾嘅世俗原則,講句難聽啲,憑鄉郊票支持嘅Erdogan根本係一個想重建哈里發制度嘅Diktator(德文嘅獨裁者),喺德國,國家隊成員同一個Diktator行得咁埋係唔可以接受。Mesut Özil 用Lothar Matthäus (馬圖斯,由今日呢篇文起,德國球員我盡量標番德文原名) 同普京老友去比,大佬,馬圖斯係退咗役至同普京交情好,佢唔係國家隊現役成員,但你依家係國家隊現役成員,你咁都得。你依家係作為德國國家隊代表,唔接受德國嘅基本價值,呢個係絕對挑機行為,唔係你踢波唔好,無人質疑你嘅表現,今年Weltmeister大把人廢過 Mesut Özil ,真正問題係政治。

呢個亦係對居於德國嘅香港人,或華人一次警號,如果華人或香港人住喺德國,唔接受德國嘅民主價值,唔該你快啲返去中國或香港,呢個問題,比你識唔識德文更重要,依家走去支持習近平或六四殺人果啲中國人,你們係唔應該住喺德國,作為一個受過納粹法西斯之苦嘅國家,德國人喺呢個問題上無商量餘地,否則點解入籍試要你識晒德國嘅政治制度至得?

本文圖片來源:https://www.flickr.com/photos/jansolo09/5097617961/,本文圖片版權條款為 Attribution-ShareAlike 2.0 Generic,特此註明

發表迴響

你的電子郵件位址並不會被公開。 必要欄位標記為 *