王健-謀殺案-min

法國佬當 王健 之死謀殺咁查係正常

王健 無厘頭跌死案,依家可能有進展,因為法國警察打算循謀殺案呢個方向去查,有人話 王健 葬咗喺美國,我唔多信,我相信法國警方有可能扣起條屍,搵法醫化驗,雖然法國嘅官僚體制係好匪夷所思,但如果想喺法國謀殺,都未必一如有啲人諗得咁容易。

王健 之死疑問太多

無錯,法國係一個有名嘅膠國,有好多嘢係無得解,包括啲官僚行為,有啲嘢,可能一百年都唔會有人識解,只不過,正因為法國係一個膠國,仲要人人都愛好玩膠,膠到直昇機劫獄都有嘅國家,所以法國警察唔可能當 王健 之死係一件正常死亡事件,膠還膠,有啲嘢膠到太盡,就係有人玩膠,唔係真係有人因一啲膠理由而無咗條命,而法國警方,都會睇到華人或香港語文媒體嘅質疑,並且作出判斷,畢竟涉及太大筆錢,同埋法國政府有份投資Airbus嘅利益。法國好多大企業都係以French State名義,國家有股份,所以法國警方對呢啲涉及公共企業嘅案件係會零舍敏感,你估中國呀,因為涉及央企至會臭屎密冚。

當然,法國警察查唔查到真相,無人知,畢竟事發地點,如果真係一單謀殺案,都係經過精心策劃,一如英國嘅神經毒劑案,已經有MOD專家介入,都唔一定會搵到真正嘅凶手,更何況呢一單,但當法國當局循謀殺呢個方向諗果陣,呢啲陰謀論越爆得多,大家對海航集團嘅信心就越細,屆時有人自保爆多啲料,或者因為海航引發進一步支爆,呢啲都係對法國利益有利嘅事,所以依家話會由謀殺案方向去查,一啲都唔令人感到意外,仲要透過《世界報》嘅華裔記者爆出嚟果吓。

中國仲有幾多黑幕,呢點我都唔知,但可以肯定嘅係,海航系嘅事,只會因 王健 嘅死浮上水面,縱使死人至可以保守秘密,同埋大可以將責任推喺 王健 身上,只不過,以中國官場果種狗咬狗個性,官場啲人為咗自己利益互咬果陣,呢啲算盤自然會打唔響,所以海航依家嘅問題,係大把花生食,只不過,都係好友善咁提醒香港啲花生友,唔好買HX, UO嘅機票,同埋要對自己嘅錢做好撤退安排,唔好一味齋只係識食花生。

One thought on “法國佬當 王健 之死謀殺咁查係正常

發表迴響

你的電子郵件位址並不會被公開。 必要欄位標記為 *