100毛-min

100毛 停實體版係好正常

100毛 宣布實體版停刊,完全變成一個網媒。其實 100毛 嘅存在根本係荒謬,又唔係好似Private Eye咁有原創抽水嘢,紙又貴,邊個傻佬買網上笑話東抄西襲嘅所謂實體雜誌,佢可以存在到今時今日,本身已經係怪談。而依家 100毛 停實體版,本身係一件十分正常嘅事,但 100毛 網上版仲可唔可以生存到,我自己都覺得十分之難講。

100毛 停實體版係上市嘅必然結果

首先, 100毛 停實體版係上市嘅必然結果,上市公司係要同股東負責,如果 100毛 實體版長期蝕錢,係根本唔可能同股東交待,甚至好多傳媒嘅實體版都會好難生存,都係果句,有乜理由你一定要消費者買份紙本,仲要有廣告效果喎,依家好多買實體雜誌係老人家,而香港銀髮族市場,係無法同德國、日本呢啲國家相比。日本、德國實體版可以生存,啲紙幾貴都仲可以生存,因為對於老人家嚟講,紙本雜誌仍然係最適合佢地嘅媒體,而老人家有呢個消費力同閱讀意欲,但香港啲老人家,你睇吓香港啲老人家邊個睇書,老人家睇書就唔會咁多廢老完全唔明白事理,愚昧到依家呢個程度,最需要睇書,其實正係呢班老人家,而唔係世界視野比老一代強好多嘅互聯網世代。

但 100毛 嘅前景,我仍然係十分負面,因為 100毛 嘅內容深度,係唔可能行任何收費模式,收費模式,唔理係月費,定係按文,按期數買,讀者期望都係Premium嘅Content, 100毛 會有乜Premium Quality嘅Content,我相信呢個係唔可能,而網上廣告係有排都未執得掂,你睇Google Doubleclick或者Adsense上面果啲垃圾廣告,本身已經夠你嘔血有餘,清理呢啲阻住地球轉嘅友仔,再加上香港成堆Adblock愛好者,係又唔俾錢睇內容,又要Adblock,又唔介意睇有大量維穩費支持嘅免費垃圾內容嘅讀者,你覺得齋靠廣告有錢賺,我一早悲觀咗好耐喇。所以當初走去抽 100毛 IPO依家又未沽果啲,果啲係傻仔嚟,只有完全唔知網絡媒體生態嘅人,至會走去入 100毛 。

發表迴響

你的電子郵件位址並不會被公開。 必要欄位標記為 *