英格蘭-克羅地亞-min

英格蘭 輸俾克羅地亞嘅原因

我唔係專業講波,但作為一個英國人,睇到 英格蘭 輸俾克羅地亞,Football is not coming home 呢樣嘢堅難受,只不過, 英格蘭 呢次輸俾克羅地亞,其實都係某程度上係 英格蘭 自己嘅問題。或者咁講,今年世界盃果啲跑唔郁,唔夠勤力嘅球隊就係會慘死。

英格蘭 同克羅地亞無得俾

今日德國隊慘死,因為球員老化,球員個個食成擔豬油咁,由3月嘅友誼賽到分組賽都無改善過,結果被KO。 英格蘭 呢場波,其實最初開局係有啲運,克羅地亞場場波都係搏老命,疲態明顯,所以一個死球得米,只不過,克羅地亞球員果種意志係嚇死人,佢地喺球場不斷走動,不斷進攻,有幾個球員,係負傷都唔肯換出,簡直係打獨立戰爭果陣打到底果種精神嚟,10號Luka Modrić不單近乎打足全場,而且每一場,中場、後防、前鋒位置佢都可以出現,係十分之勤力同體力好,克羅地亞係咁狂攻,久攻 英格蘭 無體力,又泊唔到大巴,就一定係會失波,所以 英格蘭 喺加時輸波,呢個係鬥志問題。德國輸波,都係鬥志問題,而比利時輸波,就係過份倚重Romelu Lukaku,加上Lukaku跑唔郁嘅問題(條友根本唔願跑咁滯)。克羅地亞場場十二碼咁滯咁浴血戰殺上決賽,並唔係浪得虛名。

當然,對住法國,克羅地亞仲有無力頂落去,我唔知,但佢地比俄國勤力,真戰鬥民族,如馬嶽教授所講,應該係克羅地亞。 英格蘭 想Football come back to home,可能要檢討係,自己喺球場上鬥志同勤力程度。Daily Telegraph一早有文寫到Southgate係Churchill再度,吹得太盡喇,依家離Churchill果種鬥志仲有好一段距離。

最後,如果你係用德國IP,我強烈建議你睇ZDF WM Live 2018嘅Website,佢個Myview功能,可以睇晒唔同入球嘅角度,你可以知道每一個入球係發生緊乜事,死因係啲乜。我覺得呢個功能係真心正,我個人係強烈推薦,簡直係分析球賽嘅最佳朋友。

https://www.zdf.de/sport/fifa-wm-2018/my-view/kroatien-england-68-tor-perisic-100.html#match=&action=action-highlights&team=&player=&cam=cabc

發表迴響

你的電子郵件位址並不會被公開。 必要欄位標記為 *