劉曉波-患癌-劉霞

劉霞 流亡德國

劉霞 終於獲准流亡德國,依家坐緊芬蘭航空公司客機去緊柏林。作為零八憲章其中一位聯署人,我認為都仍然係好事,雖然中國仍然十分之仆街,唔俾劉暉同時離開國家,中國有啲嘢仆街起嚟,其實係遠遠衰過北韓。

劉霞 與默克爾

首先,大家睇到德國喺 劉霞 嘅安危問題上係一直無放棄,仲有大中華膠話德國無做嘢就堅係要當眾丙爆佢。德國一直十分之努力喺 劉霞 嘅問題上,有兩個原因,一個係歷史原因,世界第一個唔俾諾貝爾和平獎得主前往攞獎,甚至整死埋佢,果個就係納粹德國,呢個德國人係覺得恥辱,齋係呢種贖罪情意結,已經令德國政府無辦法唔出手救 劉霞 。大家由呢點,可以睇到點解喺難民問題上,默克爾以至前西德地區(唔計拜仁州)嘅民眾,點解係一個近乎中門大開嘅態度,納粹德國至今仍然係德國一個好大嘅歷史十字架,呢一點,分析德國時事果陣係一定要充分考慮到呢點。

另一點係默克爾自己背景有關,默克爾係前東德嘅民運人士出身,對默克爾嚟講,佢由 劉霞 身上佢睇得番自己嘅以往,所以佢係無可能唔盡力營救 劉霞 ,只不過華人社會啲大中華膠就係急功近利,以為西方國家領袖係超人,話救人就救人,呢次喺中國被貿易戰打到七癆八傷,想同歐盟聯盟反制美國,而歐盟唔理中國,中國諗到係釋放 劉霞 想換嘢。只不過,我睇 劉霞 放咗都唔會要到中國想要嘅嘢,因為中國完全唔明白,喺意識形態上,歐盟同中國嘅分歧,仲遠遠大過美國同中國嘅分歧,而且呢種分歧,係唔可能用經貿關係去解決,歐盟依家並唔缺錢同對外經貿關係。

其實大家睇到 劉霞 成個被營救嘅過程,大家可以明白,要西方國家介入中國嘅問題,或香港人權問題,好多時係明嘅功夫外,暗嘅功夫至做得最辛苦,德國已經係好低調做咗好多暗嘢,同樣,英國都好低調做咗好多嘢,所以呢個亦係我對Jeremy Hunt嘅任命,我極大反感嘅原因,因為佢隨時為咗聽佢嘅華裔老婆話而將一切前功盡廢,Jeremy Hunt老婆喺中國嘅一切資料,係必須盡全力搵番晒返嚟。但無論如何, 劉霞 終歸都可以自由,係好事嚟。

發表迴響

你的電子郵件位址並不會被公開。 必要欄位標記為 *