Boris Johnson

Boris Johnson 應該會喺政壇消失

英國政壇震撼彈廿四小時連爆兩鑊,先有David Davis辭職,跟住連 Boris Johnson 自己都辭埋,係佢自己想辭,定首相迫佢辭,留待更有政壇內幕爆出嚟。只不過,我呢度初步分析係, Boris Johnson 呢次會喺政壇上消失,以後佢只會係一個好好睇嘅時事評論員,無其他。

Boris Johnson 執行唔到BREXIT

先講一個好技術嘅 Boris Johnson 辭職原因,就係 Boris Johnson 根本應付唔到BREXIT應付歐盟官員嘅技術要求, David Davis 係BREXIT大臣有佢原因,因為佢有份傾馬城條約,某程度上,佢係熟悉歐盟嘅諗法同玩法,但 Boris Johnson 除咗佢一口算流利嘅法文,以及曾經喺比利時生活嘅經驗,佢係無能力處理BREXIT呢啲咁複雜嘅嘢,依家要佢執行一個變相無BREXIT嘅BREXIT,你要 Boris Johnson 點玩,玩手指咩,所以齋係技術角度, Boris Johnson 已經無可能留喺內閣,作為外相,佢無可能完全唔掂 BREXIT 果堆狗屎,特別新BREXIT大臣根本唔夠熟書,搞得唔好隨時係文翠珊嘅代罪羔羊嚟,畢竟大家都知最終BREXIT嘅結果,以及BREXITER嘅下場係乜。

至於 Boris Johnson 可唔可以喺政壇玩落去,我十分之懷疑,當然BREXIT佢好有問題,但佢更大問題係,佢國家大事唔得,佢搞選區都唔得,希斯路機場三跑表決,佢身為Uxbridge選區議員票都無投,你覺得如果你係選民,諗起未來加大幾倍嘅飛機噪音,你會想點對 Boris Johnson ?除非 Boris Johnson 換另一個安全選區嚟打,否則佢喺政壇係好難生存落去,但我睇文翠珊未必會準備另一個安全選區俾佢玩,佢係情況差到,連作為後座議員穩唔穩陣都成咗大問題。

依家 Boris Johnson 可以點?佢一係學邱吉爾,忍耐多年之後,喺國家危難果陣東山再起,一係佢只能專心去做一個時事評論員,或者主持啲玩膠節目。評到,唔代表做到,呢點我比佢清楚。

發表迴響

你的電子郵件位址並不會被公開。 必要欄位標記為 *