David Davis-min

David Davis 劈炮:文翠珊清理晒內閣嘅敵人

David Davis 突然喺英國深夜時間劈炮,睇訂閱版,就應該睇咗我嘅分析。詳細嘅嘢,其實收費版有多啲背景分析,畢竟條街抄抄子太多,只不過,可以肯定嘅係, David Davis 一走,其實內閣啲BREXITER散得七七八八,根本唔會再有戰力。

David Davis 係唯一落手做嘢嘅人

當然 David Davis 啲同事有幾縮骨,我就唔喺呢度講。但有一樣嘢可以肯定,大部分BREXITER都係得個吹字,講就天下無敵,就算果個離地萬丈嘅Rees-Mogg,就係只係得個吹字,佢應該係UKIP以外最仆街嘅清談之士,實際操作嘅嘢,係 David Davis 一條友自己睇晒,但文翠珊都知道,根本BREXIT係一啲可行性都無,佢自己都提咗個唔係BREXIT嘅BREXIT出嚟,唔通 David Davis 要自己執行一個根本連BREXIT都唔係嘅BREXIT?咁就真係政治前途玩完,所以呢次佢自己深夜辭職,都應該係諗清諗清楚,而且因為佢嘅辭職,就可以騰出寶貴時間,將BREXIT過程拖得就拖,如果係可以拖得到,應該歐盟會俾多啲時間英國,然後英國自己諗辦法搞二次公投,將之前果個公投結果取消咗佢,畢竟公投係最大,呢方面歐洲都唔多方便出聲,因為歐陸正正係慣咗用公投解決問題。

文翠珊應該喺內閣無乜人再堅持BREXIT,而Rees-Mogg呢啲講多過做嘅人,可唔可以推冚文翠珊政府,呢個可能性你自己諗,一個唔落手做嘢嘅人,或者可以偷雞搏懵成功一兩次,或者國會攞到好多掌聲,但要真係坐首相呢個寶座,就唔會係呢啲無承擔嘅友仔,英國係有好多飲大咗,可以贏咗波都走去宜家搗亂嘅硬膠,但未至於傻人當道到完全選一個靠把口,聲大大無貨賣嘅友仔嘅。所以依家文翠珊真正考驗係點樣有一個好睇嘅藉口,變相留歐,或者索性唔脫歐,結束呢場膠到無朋友嘅鬧劇。禮拜六果一場,既唔係鴻門宴,又唔係長刀之夜,文翠珊兩吓散手,就將一班吹水唔抹嘴嘅政客趕出內閣,呢啲咪係留喺內政部咁耐唔死練返嚟嘅功力。

發表迴響

你的電子郵件位址並不會被公開。 必要欄位標記為 *