德國隊-min

星期日休息: 德國隊 嘅問責精神

世界盃打到四強戰,變咗歐洲國家盃,四強都係歐洲隊嚟。歐洲足球之強,大家可以睇到無可取代地位,甚至用舉國體制死谷嘅俄國都係打唔過克羅地亞呢個新興國家。咁點解歐洲足球強成咁,我唔認為我係講波專家,只不過講制度我都識講兩嘴。用 德國隊 做例子,無錯,今年打得好令人失望嘅 德國隊 大敗後嘅表現,大家可以明白點解點解依家足球係幾個民主國家玩晒。

德國隊 嘅全方位問責

對華人社會嚟講,問責好簡單,一係唔問責,一係炒咗人了事,如果呢個世界啲問題可以咁簡單,中國一早攞咗世界盃。德國無炒咗鼻屎教練 Löw ,但 德國隊 點改進,德國內部討論深度係超乎你想像,首先,傳媒係到依家四強戰,都仲窮追猛打 德國隊 嘅策略同管治。喺德國,兩個公共電視台輪流一台播一日,去到八強戰後,ARD嘅抽水性質賽後清談節目 WM-Kwartira 到依家都會抽 德國隊 水(係,所以 德國隊 教練係比德國總理更難頂嘅位置,雖然德國總理已經係日日被人抽到變人乾),而ZDF嘅主持Oliver Welke,佢平日唔講波係主持Heute-show,無錯,每個禮拜五係咁抽政治人物水果個人,大家諗吓一個政治節目操慣刀嘅人,會點處理 德國隊 大敗嘅問題,係每日直播後嘅訪問,都有篇幅講到 德國隊 嘅問責問題,甚至問題嘅深度,係可以仔細到問平治車廠用 德國隊 打廣告,果句Best Never Rest嘅口號有無問題都去尋根究底。所以 德國隊 我相信最終會攞到波衫上嘅第五粒星,但中國隊係永遠都攞唔到世界盃淘汰賽位置,因為一個國家係戰敗後徹底思考自己隊國家隊有乜問題,認真討論,甚至好細緻嘅問題都質疑。香港?係連炒晒足總果班腐敗分子都難。

要足球運動振興,唔係學人搞超級聯賽,花好多錢喺外援度,就可以解決問題。其實足球反映,除非好似美國咁,對打足球係一啲興趣都無,否則足球踢得好唔好,其實就係一個國家整體水準嘅問題。好似 德國隊 嘅一貫強勢,係同德國人對足球嘅認真態度有關。係,認真到一個討論政治問題嘅高度,所以我唔介意香港人講娛樂、講體育都好認真,因為一切認真最終都會回歸政治。只不過,香港人可惜係乜都差唔多,唔睇事實,咪死咗囉。

甚至依家四強嘅隊伍,除咗比利時比較難討論(呢個國家好膠,簡單嚟講,呢個國家係一個異形嚟,大家可以睇膠事錄對比利時嘅報導,有一個比較實在印象先),其實都係整個國家水平嘅提升。克羅地亞可以打到今日,立國果陣打浴血戰嘅意志猶在,比戰鬥民族,克羅地亞比俄國其實更戰鬥民族,22年前嘅今日,克羅地亞仲準備緊打Operation Storm,Operation Storm係二次大戰後最大規模喺歐洲發生嘅戰事,即係依家克羅地亞嘅球員,佢地童年果陣都經歷過戰火,你明個龍門點解仲要忍傷撲出十二碼,呢啲俄佬唔會夠克羅地亞人嚟,俄佬依家所謂戰鬥民族,只不過係民族自大搞出嚟,你睇到係一個白種人版嘅中國。法國被人譏笑係非洲軍團,但戴高樂能夠復國都係依靠非洲嘅力量,呢個反映法國全面吸納前殖民地子民嘅力量嘅成功,令法國隊有歐洲嘅管理,但亦有非洲嘅體力,大家諗吓呢隊乜隊。而英格蘭隊,教練Southgate自己都係有份十二碼,佢喺英國輿論唔留情面批評中學習,英格蘭可以贏到十二碼戰,搵Pickford呢個咁堅龍門返嚟,呢啲就係英國式辯論同討論帶嚟嘅改革力量,令英格蘭可以擺脫十二碼魔咒,進軍四強。俄國只係用錢搞俄超,俄國依家谷起隊波其實都係舉國體制力量,中國就係抄佢,今年俄佬入到八強俾多佢,但最後射十二碼兩球腳軟,大家咪知舉國體制下出咗乜事。

所以要搞起香港隊,都係果句,除咗一個獨立主權國家,仲要有個完整民主體制同社會風氣,香港勁揪,其實係一個社會嘅反映。

由今日開始,星期日休息一拆為二,免費同收費版題材係完全唔同。如果想成為月費會員,請去呢度:https://member.martinoei.com/checkout/?rid=pIOrwc。如果打算用銀行過數、Payme等加入,請email去 [email protected]

發表迴響

你的電子郵件位址並不會被公開。 必要欄位標記為 *