貿易戰-min

貿易戰 開打,留名等支爆

中美 貿易戰 已經正式開打,第一批三百四十億美金貨品已經開始收緊關稅,兩個禮拜後再嚟額外一百六十億美金,依家中國係無任何報復動作,但亦唔諗住真係對Trump提出嘅嘢讓步,咁玩法呢, 貿易戰 開打幾個月後,大家可以留名睇支爆第二階段。

貿易戰 開打同支爆

其實支爆已經發生咗,而且係風聲鶴唳果隻,最明顯係中國有大批民企嘅債券違約,呢啲違約事件有部分燒到去香港上市公司或H股,呢啲係要用真正外匯填氹,我都未計如果啲內保外貸一旦違約點收科。內保外貸呢個中國術語,指用中國資產做抵押,但借嘅錢喺海外用外匯提出,大家諗吓一旦呢啲內保外貸違約會有乜結果,特別做得最多呢啲內保外貸,往往就係四大國有銀行,仲有加上中國糧食係依賴海外進口,所以依家中國既唔敢報復,但又唔敢真係退讓,因為一旦堅退讓,中國有好多根本無競爭嘅企業,就會立即跳海都唔掂,好似阿里巴巴同騰訊,如果唔係有中國嘅網絡封鎖政策,你覺得呢兩個問題多多嘅copycat搞得掂?咪玩喇。

所以 貿易戰 一開打,就算中國唔報復,中國出口喪失競爭力,然後外匯流入大大減少,但中國啲高幹持續走資去海外,最終搞出嘅外匯流失,一定係人民幣匯價崩潰,銀行系統崩潰,中國用咗咁多年時間死撐,最終就係侵總統用一招關稅KO咗中國呢個空心老倌。

好多人都恥笑章家敦寫嘅《中國即將崩潰》係危言聳聽,其實依家睇番,章家敦無點寫錯,今年搞出咁大煲,其實章家敦年代都睇到,畢竟佢係真係做中國業務嘅人,唔係乜都唔識吹水,佢唯一問題係寫早咗,低估咗中國共產黨為咗死撐扭盡六壬,連香港人嘅錢都刮走嘅人渣個性。依家香港人係好應該擔心自己嘅身家保唔保得住,我因為連續債務違約,只會越搞越大劑,一如美國當年嘅金融海嘯,都係一堆債務違約搞出嚟,再加上有人賭Credit Default Swap就更加唔駛講。我依家都好想知,有無人大規模賭緊中國嘅CDS,應該依家中國嘅CDS會越嚟越貴,因為好大機會堅係找唔到數,一層一層燒上去。

發表迴響

你的電子郵件位址並不會被公開。 必要欄位標記為 *