納吉-min

納吉 終於被捕

馬來西亞前首相 納吉 終於因一馬案被反貪會拘捕,應該喺明日喺吉隆坡法院提堂,呢單案表面上唔關香港事,實際唔係,香港做咁多一帶一路嘅白手套,呢次香港好可能都要承受相當大嘅代價,甚至要承受嚟自美國嘅國際壓力,有排你煩。

納吉 啲黑錢收埋喺邊

納吉 收埋好多黑錢,呢個相信係大家都唔否認嘅事實, 納吉 同佢老婆啲手袋,仲要係頂級名貴手袋,只不過係冰山一角,真正大筆現金應該收埋喺第二度,當然唔會收埋喺瑞士、英國或者美國,因為佢已經被人睇到實,好大機會收埋喺香港,因為中共指令金管局同聯合財富情報組隻眼開隻眼閉,照計應該好安全至係。但依家 納吉 被捕,馬來西亞政府,甚至美國聯邦調查局,好大機會要求香港啲銀行交代筆錢,或者將筆錢退還馬來西亞政府,咁就會十分之大件事。以果筆黑錢嘅天文數字計,無論呢筆錢係 納吉 啲黨羽自己諗辦法走,定係馬來西亞政府要求退還,都足以造成香港金融系統,甚至樓市極大震盪,呢個係一啲都唔講得笑嘅。

仲有一樣嘢,除咗大馬,仲有乜嘢第三世界國家啲黑錢,會喺香港處理,大家仲記得成日有人講伊斯蘭金融,跟住我仲笑香港連清真寺都唔夠,仲學乜英國搞伊斯蘭金融,依家我睇伊斯蘭金融嘅真正目的,係方便中國洗黑錢用,因為好多呢啲第三世界貪腐國家都係回教國家,口就講回教清規,但可蘭經教誨唔可以貪心,就一啲都無學到,完全係神棍嚟。如果香港當年搞伊斯蘭金融成功,恐怕仲多黑錢喺香港,屆時香港真係唔支爆完就港爆都幾難,因為成個香港嘅金融體系,根本都係靠黑錢嚟維持。

納吉 呢單貪污案牽連廣泛,大家要持續留意,但由於蒙古女郎案涉及謀殺,喺馬來西亞,謀殺係死刑,唔係坐終身,所以 納吉 有可能係第一個被判處死刑嘅馬來西亞前首相,呢件事將會十分之好睇,馬來西亞政府喺馬哈迪醫生做手術之下,應該會大有起色,只不過, 納吉 都唔係食齋嘅,我恐怕條友明知自己可能會死,實行大攬炒,再加上一馬案又涉及中國政府呢個因素,依家一切只不過係開始,南洋連場大混戰,依家只係序幕。

發表迴響

你的電子郵件位址並不會被公開。 必要欄位標記為 *