林鄭月娥-樓價-min

林鄭月娥 以為咁樣可以壓抑樓價

林鄭月娥 公布新嘅壓抑樓價措施,希望為自己低迷嘅民望加番啲分。只不過,民望呢家嘢,唔係話有就有,而樓價依家喺一個微妙嘅位置,呢個位置之下亂壓樓價,我恐怕香港銀行系統死狀恐怖,成件事未必加到分,但一定好牙煙。

林鄭月娥 唔敢掂嘅核心部分

其實香港樓價失控,乜嘢居屋價錢、空置稅等等,全部都係唔對焦點,真正嘅問題,其實係大量中國南嚟嘅投機資金,加上黑錢,以及人口政策搞出嚟。依家人民幣係咁跌,投機資金實會大幅減少,呢個係唔駛講。跟住黑錢,其實香港政府對中國嚟嘅錢,狠下決心審查有無涉及貪官黑錢,自然少好多錢落嚟,但當然 林鄭月娥 唔會夠薑咁做,而150個單程證配額根本係要全部斬咗佢,所謂源頭減人,但日日仲嚟一百五十個人,你覺得唔會迫爆香港?

所以樓價又好,租金又好,除咗政府要增加土地供應,如果移民政策唔改,香港公屋同私樓嘅租務需求唔會有減嘅一日,只不過,中國投機性資金大量消失,隨時變八萬五翻版,再加上嚟大疫症或大變動,香港嘅地產市場係咁食瀉藥咁跌,跟住成堆負資產同爛帳喺銀行度,屆時堅係唔出事就奇,港幣被狙擊果陣,就唔慌唔好玩。所以 林鄭月娥 係咁追求政績,以及佢係做得啱,但實際上,未必可以立即回應市民上樓需求,而銀行有可能因投資者搵藉口撤出,搞到負資產出嚟,一如沙士之後嘅局勢,屆時 林鄭月娥 係得唔到市民支持,又解決唔到問題,但啲人可以乘機隊冧佢個位。所以我唔知邊個天才,教埋 林鄭月娥 呢啲辦法,以為可以解決樓市問題。

由所謂嘅土地供應大辯論,到依家所謂新壓抑樓價措施,都係無審慎評估過形勢,為求睇落做咗嘢亂咁嚟,香港樓價同租金係高得太唔合理,只不過都要對症下藥,兼且避免副作用太強,衍生併發症都可以死人果隻,而依家 林鄭月娥 嘅情況,正係衍生副作用隨時致命。依家香港根本無人真係識金融政策,我依家留名食花生,一旦未來幾個月香港出現資產泡沫, 林鄭月娥 一定係代罪羔羊,有啲嘢,只能講,佢根本係亂咁嚟,佢嘅政治判斷力真係低得幾恐怖。

發表迴響

你的電子郵件位址並不會被公開。 必要欄位標記為 *