藐視法庭-min-唐琳玲

唐琳玲 點解可以上到嚟香港飛機?

大鬧法庭果個 唐琳玲 ,死心不息堅持想嚟香港,竟然可以上到由北京嚟香港嘅飛機,仲要好似蘇亞雷斯咁咬人,如果要搞個人咬人世界盃,中國有可能因 唐琳玲 嘅關係攞到冠軍,雖然蘇亞雷斯啲咬功都幾強吓。只不過,撇除 唐琳玲 嘅咬功問題,更大問題係,點解 唐琳玲 可以上到嚟到香港嘅飛機?究竟邊間航空公司可以俾佢上到飛機至得㗎。

唐琳玲 無可能上到嚟香港飛機

如果 唐琳玲 由陸路或水路嚟香港,可以抵達香港關卡,咁我仲可以理解,因為佢持有中國護照,中國邊防放佢出境,咁陸路同水路理論上無嘢可以阻止佢抵達香港嘅Passport Control。只不過,空中係另一回事,航空公司有責任確保並無目的地嘅不受歡迎人物成功登機,並且進入當地嘅機場,否則理論上航空公司可以被罰錢。我只係諗到, 唐琳玲 有幾個可能性,令她可以上到嚟香港嘅飛機。

1. 中國政府有心放 唐琳玲 返香港,所以中國嘅航空公司同邊防人員,都無攔截 唐琳玲 前往香港嘅任何意圖。
2. 唐琳玲 擁有中國政府俾佢多一個身份,以至航空公司嘅系統根本無法偵測到佢係 唐琳玲 ,所以成功上機。而香港入境處亦無交代, 唐琳玲 係唔係使用其他證件進入香港。而好多國安人員,以我嘅理解,都係有兩三個無關係嘅名同兩三個唔同嘅證件以便工作,呢個亦係地下工作嘅特色。我相信 唐琳玲 係呢種情況機會好大。否則香港政府,唔會用「入境目的有可疑」呢個咁膠嘅理由拒絕入境,因為黑名單裡面嘅人物,係唔會用「入境目的有可疑」去拒絕佢入境,呢件事簡直係匪夷所思。

所以依家入境處有職員被 唐琳玲 咬出嘅血洞,政府係有必要交代究竟發生乜事,否則香港啲border做官員都好危險吓,而且依家如果唔係入境處有人主動放料俾蘋果,根本無人知道原來 唐琳玲 已經練出同蘇亞雷斯一樣嘅功夫,甚至你懷疑佢係唔係德古拉伯爵啲後人嚟。成件事黐線到咁,香港果然真係禮崩樂壞,仲要依家 唐琳玲 呢件真禽異獸究竟係乜料,根本係一個謎,依家香港呢個政府,除咗賣屎忽俾北京,就真係乜春都唔識。

2 thoughts on “唐琳玲 點解可以上到嚟香港飛機?

  1. 佢話無錢,何來有錢由北京坐機黎香港?好大成本喎!廣州有飛機黎,又唔坐,北京上海廣州至紅磡直通火車又唔坐,下次佢可能由大陸經第三個國家黎香港,不如坐洗頭艇偷渡,簡單直接!!!

發表迴響

你的電子郵件位址並不會被公開。 必要欄位標記為 *