德國輸波-min

德國輸波 ,唉⋯⋯

今年世界盃,無荷蘭隊已經係好灰(我係由細到大嘅荷蘭迷),依家 德國輸波 ,仲要輸俾南韓隊,我真係無嘢好講,我依家只能求自己嘅祖國其中一隊,亦即England可以繼續殺到決賽,或捧盃。

德國輸波 可以有幾灰

對德國人嚟講, 德國輸波 係十分之灰,因為喺世界盃之前,德國全國係鋪天蓋地講世界盃,連超級市場買條青瓜都會同世界盃有關,加上德國二次大戰後重建信心係同1955年西德國家隊有關,你話條街啲人唔面如死灰就怪,根本成個德國啲人,包括我在內,都唔會諗到,吓連南韓都輸埋,仲要2:0,你班友搞乜。所以ZDF,立即搵Löw嚟質問,無錯,呢次輸波十分之大件事,德國國家隊返德國果陣,都唔知點面對公眾。

我唔係體育專家,但我今年有睇一場德國國家隊熱身賽(對西班牙,2018年3月23日,Düsseldorf打),當時已經覺得唔妥,呢隊波好似食豬油咁打,真係有能力衛冕冠軍,都無諗過小組賽連南韓都輸呢個問題。但好多人話德國係大賽至有好表現,諗住佢係留力,但事實並非如此,今日 德國輸波 嘅表現,其實同果次友誼賽差唔多。Neuer經常空門,球員之間經常交甩波,速度好唔夠,唔好講今年比利時速度一流嘅表現,或者英格蘭啲波,控球在腳在有組織,唔係一味控住個波,但喺龍門面前,面對成堆巴士一籌莫展。

我相信德國國家隊會面臨大地震,喺德國,足球唔係體育問題,係政治問題,你班友連教練收咗咁多大公司廣告贊助,由Benz到Commerzbank,你依家交呢啲恥辱表現出嚟,呢班友唔被人鏟到上天花板就怪。所以 德國輸波 之後,係會有好多新聞睇,因為呢個國家,足球有佢特殊嘅位置。佢背後有咁大嘅公眾期望,你依家俾啲咁嘅波人睇,係一定會被人問責到底,呢樣嘢係十分之德國風味。

只不過,我仍然會支持德國隊,只要我仍然住喺德國,呢個係我作為一個人嘅責任。我唔鍾意勝利球迷,更憎人唔融合當地社會嘅態度。正如我一直認為,香港人有責任支持德國波一樣,我支持邊隊係同我嘅國族認同直接相關。

5 thoughts on “德國輸波 ,唉⋯⋯

  1. Joe 說:

    德國仲要又喪師于俄羅斯,歷史真係冥冥中有主宰

  2. 德國教練啲習慣好古怪。上次俾人影到食鼻屎,今次俾人影到攝完隻手落嗰度跟手拎上嚟聞。老老實實,我係對家教練就唔係好想同佢握手。

發表迴響

你的電子郵件位址並不會被公開。 必要欄位標記為 *