鰂魚涌公園-梁振英-min

鰂魚涌公園 槍擊案明顯係有人縱容黑幫之過

鰂魚涌公園 呢個中產核心區嘅公園,竟然發生槍擊案,果度平日飛仔都唔多個,邊度嚟有槍至得。跟住捉到疑犯全部香港人,喺四十歲到七十歲都有,傷者同行凶者全部互相認識,呢啲用基本邏輯推斷都估到係黑幫仇殺案。以往香港三合會邊有咁猖狂至得?

鰂魚涌公園 槍擊案與梁振英

HKGPao同港人講地好鍾意有乜社會罪案都推到佔中,大玩滑坡謬誤,只不過,呢單案就好明顯同梁振英喺黑幫扶上台情況下,黑幫勢力坐大有關。喺1997年前到梁振英上台前,黑幫講緊係要做正行生意,保持低調,乜嘢劈友、收保護費、販毒、黃色架步等等唔係無,但都係保持低調狀態,所以香港同黑幫有關暴力罪案唔多,要睇你自己去䏲《古惑仔》果個系列啲香港漫畫幻想吓。但梁振英上台後係另一回事,由小桃園飯局,到佔中竟然出現黑人物協助「清場」,好多藍屍仲係當睇唔到,結果係先有深水埗少數族裔黑幫成員公然街上火併,跟住就到啲大佬級人馬唔知邊度攞枝槍出嚟,講唔掂數就開槍,否則點可能喺太古城附近開槍,太古城係傳統治安極好嘅地區,住嘅人都係專業人士,就算近年中國嚟嘅貪官,佢地都唔會搞到無啦啦喺公園攞枝槍出嚟,更加唔好話Open Fire,兼且有人見血咁膠,你估香港係美國或英國倫敦咩。

如果黑社會治港呢種手段唔改變, 鰂魚涌公園 槍擊案類似案件只會陸續有嚟,唔好話香港有嚴格嘅槍械管制,我相信香港市面有唔少非法槍枝,除咗以化整為零方式買零件入嚟自行組裝,由中國大飛飛入嚟一堆都無想像中咁難,因為中國一直都有好活躍嘅黑市槍械市場,只不過槍械同彈藥唔會落入異見人士或退役老兵手上,黑市槍械市場一定係同地方嘅公安人員有關,中國貪污腐敗呢家嘢,你估第一日知咩,仲未計越南同埋金三角本身都係有非法槍械。偷運得海洛英一類嘅毒品,就唔爭在順便運幾枝槍入嚟俾大佬傍身,反正都係犯法,大家唔見走私毒品同軍火往往係一齊嚟。

多謝梁振英喇,無佢,香港啲黑幫邊度搞到好似復活咁。梁振英搞到黑幫復活嘅證據,一定強過HKGPao老屈佔中。

3 thoughts on “鰂魚涌公園 槍擊案明顯係有人縱容黑幫之過

  1. 美國咁多槍擊案都無幾何聽到「女槍手」三隻字,香港竟然聽到。

    如果係老黑,女人無得做坐館殺晒班叔伯?

  2. 太古城下午發生爭產槍擊案,44歲姓詹女子涉嫌向舅父阿姨開槍,大姨送院後證實不治。詹女任職保鑣,是香港一間保鑣公司的負責人之一,亦是行內少數的女保鑣。詹女她有武術底子,曾在外國作軍事訓練,具有數年保護富豪政要的經驗。

    車已炒,係女保鏢

    1. 女保鏢代表唔係無呢啲關係?

      話人炒車前諗清楚先

      保鏢唔會爭家產爭到攞碌炮出嚟

發表迴響

你的電子郵件位址並不會被公開。 必要欄位標記為 *