VAR

VAR :仲有好長嘅路要走

今年世界盃最受討論其中一樣嘢,應該係 VAR ,即係 Video Assistant Referee,要睇片對一啲罰球、十二碼、紅牌、黃牌、入波等再作決定。呢個毫無疑問係進步嚟,但 VAR 係唔係解決當前足球執法嘅問題,仲有好長嘅路要走。

VAR 代唔代表有片有真相?

VAR 嘅出現最大得益,應該喺西班牙對摩洛哥,西班牙射入嘅第二個入球,因為果個入球係有越位之嫌,而用 VAR 裁斷唔係越位,確係改寫戰果,否則就變西班牙輸俾摩洛哥,雖然摩洛哥人能和西班牙都好高興,畢竟摩洛哥仲有兩個港口未有隨摩洛哥而獨立,依家仍然係西班牙領土。 VAR 喺裁斷越位與否呢啲問題上,係變得有用同客觀,至少唔少入球,應該唔駛再拗餐死唔知為乜,雖然西班牙果個入球真係好運到有啲離譜。

但 VAR 係唔係代表裁決公正,我有保留,好似葡萄牙被罰十二碼果個波,係唔係蓄意犯手球,我睇片都覺得有保留, VAR 喺呢啲位係永遠唔會解決到問題,呢個係要改球例,或者對裁判執法質素有所提升先可以真正令 VAR 發揮起作用,否則 VAR 喺呢啲位,反而令球迷,至少我呢類半桶水球迷有更多嘅疑惑。

仲有一個問題,係唔係乜嘢重大嘅波都 VAR ,伊朗好明顯真係想乜波都 VAR ,乜波都拗餐死,依家要 VAR 嘅方法,其實係有啲笨拙,喺未來技術進步,可唔可以有一個更節省時間嘅方法去睇 VAR ,呢個相信係科技人嘅挑戰,既然咁難得引進 VAR 呢樣嘢,就唔該諗吓喺科技方案上做好啲,令 VAR 可以應用之餘,又唔會太影響球賽節奏,我睇 VAR 影響下嘅世界盃,隨時每半場加時去到六分鐘,甚至八分鐘,咁玩法其實係有啲問題,當然唔引進 VAR ,應該都有喺球賽節奏上嘅顧慮,因為等睇 VAR 果啲時間,堅係會影響球賽嘅節奏。

未來仲有好多場惡鬥,特別喺淘汰賽,而如果出現一啲家仇國恨級嘅賽事, VAR 更不容有失,好彩今年應該無乜機會出現塞爾維亞對克羅地亞呢類戲碼,否則我諗 VAR 果刻,頭上冷汗最多果個係球證,呢兩個國家啲牙齒印深到一個無解程度。 VAR 始終都係好嘅。

發表迴響

你的電子郵件位址並不會被公開。 必要欄位標記為 *