iQOS 要收多啲稅:黃碧雲咪硬膠

iQOS 煙彈入口,搞到出動意大利駐港總領事出馬,依家係爭在煙稅果度點計,究竟係當標準香煙嘅煙稅計,定係可以用一個Reduced Rate嘅煙稅計。不過黃碧雲好彩無走去做官,否則以佢果套膠邏輯,恐怕香港被全世界恥笑到爆都未天光。

iQOS 同電子煙唔係乾淨啲咩?

一般嚟講,依家英國嘅規管方向都係, iQOS 同電子煙都係徵收一個比較低嘅稅率,因為一般嚟講,煙稅主要彌補由香煙造成嘅健康損失,而其中最重要一項喺二手煙,以及執行相關控煙法律嘅成本。所以煙商要求 iQOS 煙彈或電子煙一個較低稅率,其實係一個合理安排,因為減少二手煙遺害係最重要嘅公共衛生任務,至少鼓勵咗啲人吸一啲對其他非煙民傷害較少嘅煙草產品先,但黃碧雲用啲乜邏輯去講,聽完簡直覺得呢班友係黐線。

呢個係根據《蘋果日報》嘅講法

但若容許加熱煙在港出售,則有機會增加年輕人吸煙率,令過去多年控煙工作形同白費,故開放入口或需配合加煙稅實行。

乜話?黃碧雲你識唔識控煙政策㗎,加熱煙點樣增加年輕人吸煙率,我真係唔明當中嘅關係,甚至德國嘅情況係,加熱煙嘅煙彈嘅包裝,其實同其他香煙類似,大大個警告字眼,只不過唔駛出果啲核突到無朋友嘅警告相片,因為煙彈係細盒好多,亦無空間去搞呢啲嘢。

有時真係好怕啲唔熟書嘅泛民議員,記者問兩句soundbite就隨口講, iQOS 煙彈又好,電子煙都好,係唔會令年青人想食煙,因為依家食煙呢家嘢,其實係一樣幾old-fashioned嘅事,減輕二手煙害反而係重要,大家諗吓一堆戒唔到煙嘅老人,繼續喺條街度吞雲吐霧,對住屋企人同子孫噴二手煙,當中遺害邊個去解決,呢樣嘢黃碧雲完全無考慮過,我真係睇完暈咗喺度,究竟呢班大帝係搞邊科。

其實依家都六月,如果食衛局快啲有決定,然後再掟俾財政司司長考慮徵稅稅率,明年財政預算案通過果陣一炮搞掂,好過依家搞到一堆走私煙彈,跟住成堆阿伯繼續喺條街吞雲吐霧,但一啲替代品都無,喺香港討論呢單嘢都搞到意大利政府介入堅係好膠。

發表迴響

你的電子郵件位址並不會被公開。 必要欄位標記為 *