Pizza-CCTVB-min

抱歉兼講 Pizza 呢回事

有時候,真係好怕中啲Photoshop高手嘅伏, CCTVB 話菠蘿 Pizza 係意大利名菜,點知果張係改相嚟,結果我都中伏,我向大家講對唔住,順便補一篇講 Pizza 嘅文補番,呢件事令大家同電視廣播有限公司不便,謹此致歉先。對於真係出錯,我係毫不猶疑咁更正。

香港啲 Pizza 點解唔好味

既然講得 Pizza ,我不如講,點解大家喺香港食到啲 Pizza 唔好食。我自己係學過吓自己整 Pizza ,只不過,有一個問題,就係成日都做唔到果種外脆內軟嘅效果,同埋啲 Pizza 成日好似出晒水咁,後嚟我就明,正宗嘅 Pizza ,至少有一件事係一定要做到,否則好難好食,就係爐溫,如果爐溫無番350度攝氏嘅話,你好唔好旨意啲 Pizza 係好食。所以香港或美國好多用電爐整嘅 Pizza 都出事,災難程度不亞於菠蘿 Pizza 都係咁解。如果你去揀一間好嘅薄餅餐廳,可以先睇吓間餐廳用乜焗爐焗,如果係一般嘅電爐,其實你都可以打定輸數,搵過第二間。

而菠蘿 Pizza 呢家嘢,同意大利人成日鬧美國佬亂改菜式一樣,都係文化衝突問題,意大利人可以容忍政府混亂,可以容忍一街都係扒手,可以容忍亂咁泊車,可以容忍啲路爛到同緬甸仰光一樣(我去過仰光,果啲奪寶奇兵式經歷,有機會講),但唔容忍啲人亂改食物,所以有人試過喺 Pizza 上加菠蘿俾啲意大利人食,大家估到後果,亦點解有人咁改圖,連我都中伏,好明顯,大家對CCTVB嘅信任程度都太低。你睇德國總理默嬸同Trump講數果張相,都可以搞錯話係白宮發,咁好難唔相信,你CCTVB班友有可能會亂嚟喎,雖然我都係要加強做fact check嘅工作。

如果你喺歐洲叫 Pizza ,想知用料正唔正宗,可以睇一樣嘢,如果 Pizza 餐牌有 DOP 三個字,即係芝士係嚟自做 Pizza 果啲指定地區,就唔會衰得去邊,DOP 全名係 Denominazione di Origine Protetta ,如果你喺香港買意大利芝士,如果無見到 DOP 三個字,你可以叫佢早抖。

再度為跟車太貼嘅意外致歉。

發表迴響

你的電子郵件位址並不會被公開。 必要欄位標記為 *