新加坡-侵金會-min

新加坡 緣何變成侵金會會場

新加坡 好快會成為侵金會嘅會場,對新加坡嚟講,呢次會議係十分重要,新加坡可唔可以扮演李光耀生前想做到「亞洲嘅瑞士」呢個目標,睇呢次大會。李光耀生前講亞洲嘅瑞士,好多人只係諗到花園城市,或銀行重鎮。但真係了解瑞士嘅含意,就唔難明點解侵金會揀 新加坡 。

新加坡 真係想做乜?

瑞士嘅居住環境好,呢個歐洲嚟講數一數二。而食物, 新加坡 應該好過瑞士,畢竟新加坡喺食物同咖啡呢兩方面,亞洲都係數一數二。但瑞士仲有幾樣嘢,一方面,瑞士係靠兵役制度,以武力維持中立之餘,亦致力做各方調解人,一個中立面面俱圓嘅地位,對 新加坡 生存尤其重要,所以 新加坡 嘅官員同民間喺南北韓和平呢個同佢睇落無關嘅問題投放好多精力,亦係點解我提出朝鮮半島中立化篇文,係喺《聯合早報》發表。所以,呢次 新加坡 可以做到瑞士傳統做嘅中立場地角色,對馬來西亞變天後嘅 新加坡 前途係關鍵,所以全國精英係搏盡出嚟做好呢件事。香港成日講乜嘢國際關係,有無人真係落手參與其中?

新加坡另一樣想學瑞士係多元民族基礎係嘅理性民主,瑞士係法、德、意、羅四語國家,如果多語國家搞得唔好,就變比利時一類嘅膠國,而瑞士佬有公投傳統,國民每一個都好清楚每個政治議題嘅後果,唔係好似英國人咁平日唔公投,一公投就投舊膠出嚟。呢個係新加坡最終嘅路向,如果話集會自由受限制所以係侵金會會場,呢個好明顯係侮辱。如果新加坡真係suppress呢方面言論自由,Howard X就根本入唔到境,更加唔好講全國嘅餐廳幾乎狂抽侵金會嘅水,新加坡人嘅爛gag同抽水能力係差唔多歐洲級別,全亞洲另一個有呢類黐線能力嘅國家,就已經係香港(所以Howard X係香港出世嘅澳洲人)。但香港唔係全民有幽默感,新加坡係《海峽時報》隨即已經報Howard X玩膠。Howard X入境受阻,更加似係政治判斷嘅結果,成件事係有精準嘅政治計算,甚至Howard X都估到其實係發生緊乜事。(雖然我覺得金正恩有興趣見一見Howard X本人)

當然, 新加坡 一向保安嚴,但呢個因為南洋根本有恐怖分子問題,一如布魯塞爾係成日有荷槍實彈軍人巡邏,儘管係天字第一號膠國,因為比利時本身係恐怖分子嘅目標。所以 新加坡 連SMRT車廠都係Protected Area,有紅色警告牌講明如果擅闖可以格殺勿論,我甚至自己在Pokemon熱潮時,在《聯合早報》分析過這個問題。有時候,我真係唔想香港啲記者,乜嘢功課都唔做就亂寫一通。我可以喺新加坡中文報紙,以外籍人士身份評論當地政治,我落筆前有好多問題係有細心思量過。

One thought on “新加坡 緣何變成侵金會會場

發表迴響

你的電子郵件位址並不會被公開。 必要欄位標記為 *