金正恩-專機-min

金正恩 可能坐中國客機前往侵金會?

今日Flightradar24出現咗一條古怪航線,一架Airbus A330客機由平壤起飛,經過北京飛航情報區後,然後一直向南抵達新加坡樟宜機場。令不少人都估緊,中國係唔係會借出主席專機俾 金正恩 ,令佢體面抵達新加坡出席侵金會。

金正恩 係唔係坐中國客機

呢架執行平壤-新加坡特殊任務嘅飛B-6130,近排主要飛墨爾本同北京之間航線,所以我相信呢架平壤飛出嚟嘅飛機,未必係載住金正恩本人,因為如果呢個規格嘅機出現,就真係有啲削,呢架機有可能係載住特別係北韓嘅支援人員,因為大家都知高麗航空啲機根本唔係人坐,捱唔捱到四千幾miles真係好成疑問。所以,唔涉及咁機密事項嘅人員,好可能就係由呢架機直接送到新加坡。B-6130隨即會返北京,所以應該係一次過嘅包機嚟,正常安排。

而 金正恩 坐乜機,呢個係一個懸念,因為如果中國借出主席專機,對中國同北韓都有保安疑慮,北韓會怕中國會竊聽,變咗成程機根本乜都唔傾得,或乜都唔做得,如果習近平自己喺埋架機度就仲煩,呢啲膠事,唔好話唔會發生,北韓宗主權對中國嚟講係極度重要,由大明帝國、大清帝國到中華人民共和國,三個以北京做首都嘅國家都係因朝鮮半島問題同外面嘅國家大打出手,你知發生乜事。

而對中國嚟講,如果 金正恩 坐主席專機,即係北韓人員將會知道成架主席專機嘅重要參數,如果北韓將會投美,北韓將啲參數俾晒美國,豈不是跳海都唔掂?縱使主席專機係一架波音747,但如果涉及國家安全嘅改裝,一般都會交俾中國自己搞,波音一般都唔會插埋去,甚至美國都唔會俾波音提供一啲敏感技術。呢啲係基本嘅涉及國家安全嘅常識。所以仍然有可能 金正恩 坐佢老豆留低嘅奇怪飛機,經福州做檢查,然後抵達新加坡,但準備人員就先去咗新加坡先。

仲有一個可能性,就係南韓提供專機,或新加坡提供專機搞掂 金正恩 嘅問題,咁習近平就連福州都唔駛去,之後平壤直接飛入仁川飛行情報區,由韓、日、菲、馬四國空軍接力護航。呢個可能,其實係戰術上最近磅嘅一個。特別星航作為flag carrier,應該好樂意接呢個任務。

發表迴響

你的電子郵件位址並不會被公開。 必要欄位標記為 *