黑色暴雨警告-min

黑色暴雨警告 問題:除咗市區,其他香港嘅人唔係人?

今日香港好多地方落狗屎咁,德國都會落狗屎,但通常落一陣就無,而且德國排水系統好過香港。而香港落狗屎,例牌大塞車,或水浸,但新界咁多城鎮落大雨,天文台都話無廣泛地區大雨,所以唔發 黑色暴雨警告 ,呢件事充分反映香港呢啲警告信號系統嘅落後。

黑色暴雨警告 只係以天文台做中心

無論 黑色暴雨警告 定八號風球,一直以嚟為人詬病嘅問題係,呢個系統,其實係以市區安全為大前提,總之市區大風大雨就好快八號風球或 黑色暴雨警告 ,但如果市區係天氣無大變,而新界鄉郊打到拆天都好,佢都唔理。呢個系統,喺未有新市鎮果陣,咁都可以接受,因為香港大部分人口,甚至機場都喺市區,但依家乜嘢年代,乜嘢世紀呀,依家香港好多人口都係住喺新界鄉郊地區,你仲用一個以市區主導嘅系統,件事都十分之大問題,香港好多時交通大亂,或市民要冒險喺惡劣天氣返工返學,完全因為天文台嘅系統落後,而啲大官個個唔係住港島就住九龍,普羅住新界嘅市民要搭公共交通工具,搞到一鑊泡,關呢班大官叉事。

所以,要解決成個問題,一定要八號風球以及 黑色暴雨警告 作出改革,例如 黑色暴雨警告 ,如果新界有幾個大城鎮,出現大暴雨,就要出 黑色暴雨警告 ,例如沙田、屯門、元朗、將軍澳呢啲大市鎮,應該咁做先。

同埋,香港嘅人口稠密程度,係有啲區嘅人,已經係一個德國大城市(無錯,我講緊大城市,Dusseldorf果個級數果啲),你用呢個角度去理解,就應該引進局部地區 黑色暴雨警告 ,例如一啲人口勁多大鎮,以沙田同將軍澳為例,一旦呢啲地區雨量去到某個數字,當區居民唔駛返工,當區學校、辦公宝、工廠可以停止運作,咁樣可能好啲,因為實際上,香港係等於好多國家幾個城市,咁嘅分區安排,其實亦都合情合理。

當然,香港好多老闆,佢地唔想有八號風球或 黑色暴雨警告 ,我可以理解,因為香港成個系統弱智到係,一旦 黑色暴雨警告 ,支票過戶同網上跨行過數即停,呢個唔知乜邏輯嚟。德國都唔會因天氣停咗SEPA Transfer,甚至有時德國假期,SEPA都唔會放假。所以香港銀行應該八號風球同 黑色暴雨警告 照常處理跨行帳目,咁會合理一啲。

4 thoughts on “黑色暴雨警告 問題:除咗市區,其他香港嘅人唔係人?

  1. 暴雨警告我認同好多改進地方,但分區警報始終覺得唔可行,一黎停工既應該係住係果區,係果區返工,一或連返工必經呢區既人都可以唔返?
    另外香港太細,15分鐘大雨可以沙田去左大埔,之後上埋深圳,咁分區暴雨警告半個鐘上上落落無意思。
    個人覺得最好係將新界北水浸警告改為適用於全港十八區,然後帶有停工停課功能。大雨可以來匆匆去匆匆,但停左雨都可以繼續水浸,而且計落雨本身無危險係大雨造成既水浸先至危險,用水浸黎決定停工更適合

    至於打風,現行機制維港天星既風速真係變左參考,決定上唔上八的確係睇8中幾(8個指定站有幾多個達標)唯一仲要改善係換走內陸根本起唔到風既打鼓嶺同沙田。

    所以現時暴雨警告的確仍然側重市區,但風球完全唔係,呢點搞錯得太犀利所以想糾正一下。

  2. 「雨量站的分佈密度因地區而異,佈局考慮了不同因素,在水浸風險、山泥傾瀉風險、人口密度較高的區域,雨量站會較密(圖一)。若果大雨在雨量站較密的地方出現,錄得高雨量的站數自然較多,發出暴雨警告的機會亦會增加。」

    其實呢個已經解釋左,點解注意力會集中喺九龍,因為九龍人口密度最高。但其實個問題始終係,好多時暴雨突然來突然去,現實中水浸幾大同幾耐其實唔係天文台睇到,因為最大影響既未必單單係雨量,而係要睇渠務。D渠唔好,一下子就浸,浸一陣又冇。如果政府一早叫你唔使返工返學,兩個鐘之後又叫你返工返學,D人仲更加火滾。

發表迴響

你的電子郵件位址並不會被公開。 必要欄位標記為 *