港鐵-馬時亨-min

馬時亨 係咪想港鐵海外所有生意消失

一直以嚟,我對 馬時亨 呢條友無乜好印象,正宗擦鞋仔一件。只不過,依家 馬時亨 喺港鐵沙中線豆腐渣工程嘅表現,係最令人憤怒。點解我咁講,因為 馬時亨 嘅做法,係可能令港鐵失去喺海外投標工程或管理合約嘅機會,呢個商譽損失係好難挽回,係唔係你 馬時亨 一條友送去北韓俾金正恩處決,就可以解決?

馬時亨 有幾唔負責任

點解我一直反對中國高鐵香港段由港鐵管理同營運,因為港鐵控制唔到技術同買車,一旦有事就係港鐵孭鑊,然後港鐵喺香港營運表現做壞咗個朵,就可能失去喺歐盟嘅管理合約,呢件事絕對係會因小失大,唔係講笑。而依家沙中線搞到咁豆腐渣,你估乜國家考慮營運合約果陣,都係純粹價低者得,梗係唔係,價低好多公司都識做,但表現垃圾就大家唔會將合約交俾你間Non-EU公司。所以 馬時亨 作為上市公司高層,一切只識得政治掛帥,完全不知所謂,根本佢就應該落台問責,學乜人做上市公司主席,返去早抖喇,又話自己有病唔做得局長,依家又學乜人做咁大間上市公司主席,你話係唔係?

我依家唔講政治,我知道好多人討厭政治,我同你講公司管治,因為公司管治會影響大藍籌嘅股價,特別中國啲國企嘅公司管治都係垃圾,根本唔可以長期持有,或適合做退休金投資組合果陣,港鐵作為一隻阿婆可以擺落床下底投資嘅股票,公司管治係更加要睇住,而豆腐渣工程搞到咁,即係 馬時亨 治下嘅港鐵公司公司管治有問題,我唔係專業投資者,但如果要我長揸呢隻股票,我嘅答案只會係No,因為 馬時亨 好明顯係有護短兼死雞撐飯蓋之嫌,而且果啲鋼筋嘅問題,有可能帶嚟潛在賠償風險,以及有可能令港鐵未來融資能力,以及保險購買等方面出現問題,咁點解我仲要持有港鐵,仲要依家港鐵剩番嘅地產項目越嚟越少,而香港地產市場嘅風險,又越嚟越高,咁樣係一啲都唔掂檔。

馬時亨 應該踢出港鐵公司,如果 馬時亨 唔離開港鐵公司並向公眾道歉,唔搭港鐵,以及沽售港鐵股票,可能係香港人有效對呢啲垃圾管理層作出抗議嘅方法,有乜事唔好向股民求(但向納稅人求機會好大)

One thought on “馬時亨 係咪想港鐵海外所有生意消失

發表迴響

你的電子郵件位址並不會被公開。 必要欄位標記為 *