日本VISA咭

VISA 歐洲網絡大亂有幾大鑊

喺歐洲時間6月1日晚, VISA 歐洲出現大亂,間歇性碌唔到卡,喺禮拜五晚呢個時間,仲要歐洲部分國家已經玩緊無現金社會, VISA 歐洲出現大亂係一啲都唔老嚟嘅事,而大家知道歐洲嘅Point of Sale網絡係點搞果陣,你就知有幾大鑊。

VISA 卡網絡做埋EPS嘢

喺香港,一般人只係識 VISA 卡同 Mastercard 卡,仲有銀聯卡,喺歐洲嚟講, VISA 卡除咗用得喺傳統掛住 VISA 個名嘅debit card同Credit Card外,如果好似香港EPS咁銀行過數俾錢,由於歐盟咁多個國家,成日跨境買嘢係正路,好似我咁,都要成日過去荷蘭,因為有啲嘢係荷蘭比德國好,同樣,都會有荷蘭人過嚟德國,因為有啲嘢,德國係好過荷蘭。所以喺SEPA(Single Euro Payment Area)嘅成員國,有一種叫 V Pay嘅嘢,承擔類似EPS嘅責任,而另一個主流嘅網絡,就係Mastercard主導嘅Maestro,只不過由於Maestro同時用得喺部分非歐盟國家,喺歐洲有啲人揀銀行果陣,會同時考慮張bank card用乜嘢network,因為唔係個個都會申請Credit Card或Debit Card,喺德國,成日用Credit Card買嘢係稀有人種嚟。

V Pay建基嘅網絡,都係同VISA卡一樣,簡單嚟講,只不過係EMV Chip用嘅Application唔同咁解,所以 VISA 歐洲網絡一出事,就牽連廣泛,造成十分之大嘅唔方便。仲要一樣嘢,部分歐洲國家,唔係話有提款機就有,或者提款卡收嘅charge貴到hihi,我喺荷蘭都中伏幾次,或者櫃員機根本無咁多Cash突然要應付大批人嘅提款需要,結果件事係十分之硬膠,大家可以諗吓喺酒吧同餐廳,有幾多人係好尷尬。

所以,如果唔想自己突然間行行吓街錢都無,其實有兩三個銀行戶口,喺歐洲係好正常,因為有啲錢擺Mastercard世界,有啲錢擺VISA嘅世界,可以平衡風險。所以依家香港EPS獨大,以及銀聯獨大嘅做法,係十分之唔健康,根本應該搵反壟斷機構郁佢。

發表迴響

你的電子郵件位址並不會被公開。 必要欄位標記為 *