Wind of Change-min

六四與另一股 Wind of Change

六四悼念問題,如果唔係有人硬係要做大中華膠,應該無乜好爭論。如果你係揸住BN(HK)A 1990嘅BC,或者依家你因唔同原因住喺歐陸,六四悼念無理由缺席。大家睇 Wind of Change 呢首歌,特別喺2005年版嘅MV,就明點解。

Wind of Change 與六四

Wind of Change 係譚詠麟再等幾天嘅原曲,香港班白痴改咗做情歌,但呢首由德國樂隊Scorpions所寫嘅英文名曲,卻係本來十分之政治。大家可以睇吓Scorpions官方喺YouTube推出嘅MV,所有畫面,你就明點解。

1989年北京大屠殺,係喚起歐洲嘅反抗意識,反抗蘇聯殖民嘅意識,跟住就係波蘭共產黨政權輸選舉,同埋東德政權崩潰,呢一連串事件後,有今日嘅歐盟同德國。如果你係BN(HK)A 1990嘅BC走去投共,我一向當呢班友係人渣看待,因為我清楚佢地本BC本來嘅用途係乜,唔該周融同梁君彥家族其餘成員交出英國公民護照出嚟,佢地唔配有任何形式嘅英籍。而如果你住喺歐陸,今日嘅歐陸,係受1989年北京嘅亡魂啟發而走向今日呢條路,所以我話悼念六四,只要唔係支聯會果隻民族主義,係同港獨或歸英信仰無衝突,波羅的海三個加盟共和國,就係同時走向呢股大潮,脫離蘇聯獨立成功,亦係前蘇聯加盟共和國中,少數能夠喺獨立不久加入歐盟。

依家已經開始另一股Wind of Change,醒目都知呢股 Wind of Change吹緊過嚟東方,而且將會帶嚟一股巨變,至少馬來西亞乘住呢股改變之風,完成咗最終嘅政黨輪替,向一個全面嘅民主國家進發。依家香港可唔可以掌握呢股風,其實就睇香港人能夠掌握民主同住民自決同解放嘅關係,建設民主中國係對世界好,呢點我唔否認,只不過波羅的海三國無責任建設民主蘇聯,呢個亦係事實。至於點把握 Wind of Change,呢個係呢個時代嘅人嘅集體造化,智慧唔夠就掌握唔到。馬來西亞人係智慧夠,否則唔會出現復仇者同盟,但香港人智慧夠唔夠,睇香港人嘅六四論述就好容易明白。

發表迴響

你的電子郵件位址並不會被公開。 必要欄位標記為 *