洗碗碟機

洗碗碟機 :要慳水應該推廣安裝

啲左膠,成日話要慳水,都喺沖涼呢啲位講。但如果真係要講慳水,其實首要解決係洗碗,實際上,香港由普通家庭到餐館,都仲係用手洗碗碟嘅習慣,呢個好有問題,呢度浪費嘅水同電,遠多過用 洗碗碟機 。

洗碗碟機 慳水係有科學證據

喺1994年前出產嘅 洗碗碟機 ,用水超過35升一次,但近年出嘅 洗碗碟機 ,由於設計上大大改進,要用嘅水,大概係11升到17升一次(full load),而你用手洗碗碟,你講緊可能用成五十升至一百升水,大佬,有幾多食水無無謂謂用咗喺洗碗果度,依家香港又唔係無座檯 洗碗碟機 ,我完全唔明點解香港仲一街都係用手洗碗碟。如果政府整個資助市民買 洗碗碟機 嘅計劃,有可能更有效咁令水資源得到充分運用,只不過,啲環保膠,邊個認真審視呢啲數據。

同樣喺用電或碳排放上都係,依家嘅 洗碗碟機 ,就算德國、美國用大部果啲,每次洗碗真係用1-2度電左右,但如果係手洗,冬天啲煤氣費或即熱式熱水爐電費貴到你hihi,因為 洗碗碟機 嘅發熱設計,係有效率過你由熱水爐再出水喉,仲未計如果要殺菌,其實要成40度以上嘅水,根本唔可以用手,但 洗碗碟機 ,可以用50度以上嘅水,係保證可以有效消毒碗碟。

我估香港真係有問題,係超級市場無俾 洗碗碟機 嘅配套,所以洗碗粉,其實係有最簡單功能果啲,因為香港唔係硬水,所以表面上唔會有問題,但之後你烘乾碗碟嘅功夫,或者你清理 洗碗碟機 果啲工序,你就煩到想死,所以德國一般係用多合一Tab,成粒擺入擺洗碗粉嘅位置,然後由軟化食水、到洗碗,到清理機底嘅污糟嘢,一次過做晒,跟住每幾個月用果啲洗碗碟機用嘅清潔粒,空機洗一次,咁就好乾淨, 洗碗碟機 係好易打理嘅電器嚟,甚至好多時,你根本唔駛考慮請外傭嘅問題,因為實際最麻煩嘅家務,就係洗碗,但洗碗喺西方國家從來都唔係問題。

為咗慳水,我認為大家買部 洗碗碟機 認真慳水,好過搞乜嘢沖涼沖果幾分鐘完事,沖多幾分鐘涼都要鬧人,香港有幾多環保分子係真心用科學角度看待問題,我好懷疑囉。

(我唔知Citysuper啲洗碗粉或洗碗粒香港賣幾錢,但我都考慮賣德國常用果啲㗎)

4 thoughts on “洗碗碟機 :要慳水應該推廣安裝

  1. 香港果啲廚房細成咁,仲點放得落洗碗機呢?
    況且countertop果啲都唔係最慳水。而中國人果啲飯、湯碗唔會好似鬼佬啲碟咁靚仔一排排咁放落部機度,部機容量少左,變相令啲人覺得手洗仲好。
    仲有就係香港啲洗碗機貴歐洲幾倍!大佬呀,我部Miele買左£400!香港呢?萬幾!

  2. 美的出左針對中國人餐具冼碗機,細細部可洗4人餐具,價錢先2千2,重有30個月保養

  3. 位,係諗出嚟,要整,幾細嘅廚房都會生到個位出嚟放機。洗碗機貴嘅問題,係講緊買外貨最高級別嗰啲啫,只要望上啲啲,大陸大把又平又好用嘅機。洗碗機 group 入面大把谷友都係淘落嚟自己裝或揾師傅裝,用咗幾年都冇問題。自己唔肯踏前啲望,就唔好話冇選擇。

發表迴響

你的電子郵件位址並不會被公開。 必要欄位標記為 *