六四-1-min

對支聯會搞 六四 晚會嘅諸般質疑

相信我對 六四 嘅立場,比支聯會班友硬好多,因為我唔用六四事件,或平反六四呢啲口號,北京大屠殺就係北京大屠殺,要做一定係追究屠城責任,呢個不分國籍。但支聯會諸公對 六四 好多夾帶私貨嘅嘢,呢個正係好多年青人根本唔想同你班友玩嘅原因。

支聯會對 六四 立場根本唔夠硬淨

首先,唔該支聯會諸公嗌得結束一黨專政,就唔該唔好要求平反八九民運,只係追究屠城責任就得,八九民運相關嘅刑事罪名,結束一黨專政自然會平反,共產黨自己唔會做。

而支聯會成件事令人最反胃,其實係如果係追究屠城責任,就追究屠城責任,呢個係不分國籍,正如追究納粹屠殺猶太人嘅責任,一樣係不分國籍嘅人類共同責任。但支聯會夾帶乜私貨,又乜嘢中國夢,最早提出中國夢果個唔係習近平,係支聯會,支聯會年年集會都猛播羅文果首《中國夢》,我懷疑習近平睇完支聯會播呢段歌,自己都洗埋腦變埋自己嘅口號,你估有乜奇。我諗依家中共至認識到,司徒華留低咗啲乜嘢,所以依家反而怕八九紀念集會少人去,唔同班土共嘅諗法。但係香港有好多反對北京大屠殺嘅人,根本唔係中國國籍,好似我就係,咁唔通八九年果單屠殺唔關我事。反而建設民主中國呢家嘢,其實真係唔關我事,中國用乜嘢政體,關我叉事咩,我只係要香港唔再係中國屬土。

另一樣嘢惹起好多人對支聯會嘅質疑,係果啲政治上唔夠硬淨啲人,軟弱嘅人,點解仲喺度,好似搞到香港議會大亂嘅千古罪人梁耀忠,我唔明點解佢仲喺八九民主大遊行前頭位置,跟住好似蔡耀昌呢啲廢柴,點解仲會喺度,好似呢張相果啲有頭有面嘅人裡面,可能係得何俊仁叫真係值得尊敬,雖然佢都膠過,但何俊仁喺協助中國果啲受難維權人士上,佢確係付出咗好多,同作出咗貢獻。啲人睇到支聯會呢個牌頭,只會諗起政棍大聯盟,同司徒華仲喺度果陣,真係不可同日而語,所以呢個亦係好多人對支聯會有諸多質疑嘅原因。

當然,熱普城果啲抽水,一定係要毫不猶疑咁打柒佢,而1989年北京大屠殺嘅責任,唔理你國家認同係點都要追,用軍隊殺平民係反人類罪行,支持果啲土共等同納粹。但如果要搞集會,唔駛再跟支聯會,年青人應該喺追尋人類公義嘅角度,賦予紀念1989年嘅死者新嘅價值。紀念死者,唔一定要支持所謂建設民主中國,請將紀念死者與民族主義脫鈎。

2 thoughts on “對支聯會搞 六四 晚會嘅諸般質疑

  1. 你話唔跟支聯會我冇乜意見,不過話唱《中國夢》係夾雜私貨就未免太重,因為人地個名一開始就寫到明「愛國」兩個字。呢樣野從來都冇隱瞞過,你話佢大中華膠,都公道過話佢夾雜私貨。

發表迴響

你的電子郵件位址並不會被公開。 必要欄位標記為 *