阿叻-min

阿叻 真係叻,幫粉嶺高球會倒米都得

喺強伯生前,對 阿叻 有好精確嘅描述,喺評論今日香港電台視點31陳淑莊對 阿叻 之戰呢樣公關災難果陣,一定要引番 林振強 嘅金句,大家之後就應該明白支持粉嶺高爾夫球場班友,應該喝住 阿叻 千祈唔好俾佢上電視至啱。

任何電視節目,只要見阿叻有份出現,你就知道,這個節目必會變為業餘、不認真,和像馬戲團。以一人之力,左右一個騷,或一件盛事,這正是我渴望擁有的影響力。

阿叻 係乜台節目都唔上得

林振強生前呢篇文,可以講係寸人寸到爆嘅經典。 阿叻 根本係小丑型人物嚟,當明知佢係小丑嘅時候,任何重大政策辯論都唔好搵佢上,呢個係公關常識。公關同政治一樣,都係關乎人嘅觀感問題,你搵件柒頭出嚟辯論,就未打先輸,之後乜嘢道理都唔駛講落去。偏偏, 阿叻 對住陳淑莊呢啲咁削嘅對手,都可以輸九條街,呢樣嘢我個人認真幫唔到 阿叻 本人。

要保住粉嶺高爾夫球場,唔係無辦法,如果你問我點做,就係迫新界佬啲貨櫃場嘔番啲地出嚟,香港人對班新界原居民都睇唔順眼,呢啲嘢可以順水推舟,如果 阿叻 識咁講,就唔係果個被強伯寸到一棟都無嘅 阿叻 , 阿叻 竟然話要重新填海。填海?你無嘢嘛,喺維港填海,依家除咗可以討好啲中國嚟嘅貪官,基本上,港島大部分居民,都唔會贊成,住緊海邊果啲唔會贊成,而由於屏風樓問題,住喺內街一樣唔會贊成,你依家話政府要強勢填海,結果係連本來仲會去高爾夫球場打吓波果班港島人,都會企喺對家果邊,所以強伯講得一啲都無錯,以一人之力,左右一個騷,或一件盛事,呢啲燈神級嘅影響力,你話邊度搵,都唔知係唔係政府專登叫 阿叻 呢啲友仔,搞到香港粉嶺高爾夫球會班友一鑊都係泡。

今年世界盃由於唔係無線播,兼且荷蘭入唔到決賽周,所以 阿叻 可能好得閒,只不過, 阿叻 呢條友,根本應該喺娛樂圈消失,唔好話出現喺重大而嚴肅嘅公共政策討論之上。如果我對公關界嘅最基本最基本忠告係,有啲柒頭,你最好收埋佢一二邊,例如 阿叻 或西門梓敬呢啲友仔,你雪藏佢係對自己好,你搵呢啲友仔出嚟,其實同自殺無分別。

One thought on “阿叻 真係叻,幫粉嶺高球會倒米都得

  1. 佢最蠢既事唔係講填海,而係聲稱關閉一個(唔係所有)哥爾夫球場會令十七萬人失業,同埋反對陳淑莊將哥爾夫球場搬去修復堆填區既建議,反問點解唔用黎起樓(樓就驚沉降啫,本來就凹凹凸凸既哥爾夫球場驚乜野﹖)

    聲稱貨櫃碼頭冇用既人,亦都顯然係冇留意數據。雖然大陸港口的確係搶走好多生意,但其實香港貨櫃碼頭既貨量仲係好多,只係唔再需要起新碼頭咁解。

發表迴響

你的電子郵件位址並不會被公開。 必要欄位標記為 *