Royal Wedding

星期日休息: Royal Wedding 與文化民族主義

Royal Wedding 終於完咗,呢次係英國皇室首次有王子迎娶一個黑白混血嘅妻子,雖然好多堅持種族主義,或階級思想嘅英國人,未必接受呢次婚禮(香港都有呢類華裔老英國人),但英國皇室俾美國黑人傳教士喺皇室婚禮講道(問心,好誇),騷靈音樂首次喺皇室婚禮出現。我未必話呢次婚禮平民化,始終英國要保持好多呢啲皇室禮數,保持文化軟實力,但英國連皇室都走向文化民族主義,呢層係肯定,英國皇室每一步,每一個動作,都有佢嘅考慮。

Royal Wedding 嘅背景

呢次 Royal Wedding 喺BREXIT焦慮到爆嘅背景下進行,如果英國無咗歐洲,除咗係一眾英聯邦國家嘅前宗主國,以及一眾英聯邦國家嘅名義君主,英國憑乜喺英聯邦重新有一個領導地位,依家英聯邦其中一個最有影響力嘅成員國係印度,而澳洲、紐西蘭、加拿大都喺左膠影響下,某程度上都係多元文化,行文化民族主義國家,而歐盟兩強,法國同德國,都明顯向文化民族主義轉型,咁英國剩番乜?無論BREXIT最終成事與否,英國面對全球化嘅激烈競爭,文化民族主義係唯一可行嘅路,但英國一直無呢個傳統,所以英國係一次快速嘅轉型,除咗喺法律上,要消除種族主義因素,喺文化上都要啲英國人接受多元道路,呢個變成當務之急,而呢次 Royal Wedding ,雖然哈利王子好大機會繼承唔到王位,但無可否認,喺歐洲似樣王室買少見少嘅情況下,呢次係一個好好嘅舞台,去說服英國人接受,連王室都可以接受一個少數族裔嘅成員,國民就更有必要去接受。

呢次將美國非裔嘅傳道成分加入婚禮,某程度係對班BREXITER嘅文化容忍度測試,Jacobs Rees-Mogg 一類仲係發舊帝國大夢嘅人,成日以為可以同美國聯盟,如果真正美國嘅文化,由靈音派果套傳道方式,到騷靈音樂等等,依家入埋皇室典禮,你班友係唔係真心接受,如果唔係真心接受,咁你班友諗住靠乜同美國聯合,英國人忍耐唔到美國嘅嘢,豈只一個Donald Trump呢位重口味總統,美國有好多文化元素,你未必係你英國班友真心可以接受,而當果位美國傳道人喺教堂講緊嘢果陣,英國上流社會一眾人等嘅表情,其實係好有趣嘅紀錄,有幾多人真心接受到同美國聯合呢家嘢,大家都心中有數得很。

大家都知BBC World News,雖然好多內容同BBC News相若,依家亦無咗FCO補助,佢某程度上,編採上仍然好有FCO背後指導嘅色彩,特別BBC本身仍然係一間受政府皇家特權嘅「公司」,大家留意,BBC World News嘅直播,好強調Commonwealth呢樣嘢,同埋故意喺街上面,搵觀禮嘅人訪問,係搵個香港嚟嘅訪問,Commonwealth聯繫係未來BREXIT嘅主題,而UK-Hong Kong relationship更係未來嘅關鍵,因為遠東嘅一眾前英國屬土中,最多人仍然持英國國籍,文化上最親近英國,甚至支持英國,經濟實力最好,就係香港。所以英國對香港嘅心戰,係唔會有完結嘅一日,因為無香港呢個地方,其實對住遠東嘅英聯邦幾個有錢成員,以及新近民主化開始嘅馬來西亞,英國其實乜嘢都唔係,呢樣嘢正係英國最弱嘅一環之一。某程度上,二次大戰期間BBC Empire Service嘅影子,仍然喺BBC World News嘅編採上存在。

喺美國呢個地方,如果演員要上大碼頭,大把碼頭可以上,美國唔欠缺有錢而虛榮嘅人,亦唔駛令自己登上英國搞政治工具嘅舞台,王室喺英國,唔只係一個法律基礎,亦係英國執行國策嘅軟性工具,否則英國人留個王室做乜。呢次 Royal Wedding 某程度都係宣布一個時代嘅開始,係英國走向種族多元文化民族主義開始,我相信呢啲典禮儀式,或者有其他種族嘅文化元素滲入,但唔會令英國呢套王室文化瓦解,或者日後會有有色人種嘅首相,甚至有唔同膚色嘅王子公主,甚至國王,但英國文化嘅本質不變。一如去年諾貝爾文學獎得主石黑一雄係日本裔英國人,但佢寫嘅故事,The Remains of The Day嘅背景,依家係一個英國嘅故事。

2 thoughts on “星期日休息: Royal Wedding 與文化民族主義

  1. 「未必接受呢次婚禮(香港都有呢類華裔老英國人)」
    我唔系老英國人但我都系接受唔到 LOL

  2. 如果文化民族主義係必行之路,而澳紐加做得早過英國,咁果D主催既左翼就唔可以叫左「膠」了,因為這是先見之明。

發表迴響

你的電子郵件位址並不會被公開。 必要欄位標記為 *